Jurgen Uldedaj është zyrtarisht kampion bote! Boksieri shqiptar ka fituar titullin e kampionit botëror të organizatës International Boxing Organization (IBO) në peshën cruiserweight, duke bërë historinë për boksin shqiptar.
Në një duel shumë të pritur, Uldedaj u përball me boksierin kamerunas Rolly Lambert Fogoum dhe arriti të fitojë për të marrë titullin botëror.
Publiku në “O2 Arena” në Londër, i cili përfshinte shumë tifozë shqiptarë, e mbështeti vazhdimisht Uldedajn, ndërsa pakënaqësia ndaj mungesës së intensitetit nga Lambert u ndje qartë në sallë.
Në fund, Uldedaj e mbylli ndeshjen në kontroll të plotë, duke e dominuar teknikisht dhe fizikisht kundërshtarin. Edhe pse dueli nuk ofroi emocione të mëdha, performanca e qëndrueshme i mjaftoi Uldedajt për të siguruar një fitore të pastër dhe për t’u shpallur kampion bote në versionin IBO për peshën “Cruiserweight”.
