Një shtetas i Kosovës është dënuar me 10 ditë burg në Mal të Zi pasi pranoi se kishte shkruar grafitin „APRZ UÇK 1878“. Përveç kësaj, ndaj tij u vendos edhe masa mbrojtëse për dëbim njëvjeçar nga territori i Malit të Zi.
Ky rast ka ngjallur reagime në opinion, pasi ndër vite në qytete të ndryshme të Malit të Zi shkruhen grafite fyese dhe nxitëse kryesisht kundër shqiptarëve e boshnjakëve, por nuk dihet për ndonjë rast kur autorët e tyre janë arrestuar dhe dënuar me burg.
Kjo qasje e institucioneve ngre pyetje për standarde të dyfishta dhe trajtim të pabarabartë.
Rreth rastit të arrestimit të shtetasit të Kosovës, nga politikanët shqiptarë në Mal të Zi ka reaguar vetëm Mehmet Zenka (UDSh).
Zenka thekson se rasti tregon mungesë të barazisë dhe zbatimin e ligjit: “Nëse do të shikonim të gjitha grafitet që fyejnë ndjenjat e kombeve të tjera në gjithë Malin e Zi — përfshirë ato që glorifikojnë figura si Ratko Mladiq dhe Radovan Karaxhiq — shumë raste do të duhej të ishin ndjekur penalisht,” tha ai. Ai kërkoi që institucionet të trajtojnë në mënyrë të barabartë të gjitha shprehjet e urrejtjes dhe glorifikimit të krimeve, pavarësisht përkatësisë kombëtare.
“Mund të jetë që grafiti i Ushtrisë Çlirimtare të Kosovës nuk e ka vendin në Herceg Novi, pasi struktura etnike e vendit mund ta shikojë si provokim” tha Zenka, dhe shtoi se – UÇK është vlera më e madhe shqiptare për neve.
Një gjë është e sigurt – në Mal të Zi vazhdon të mbizotërojë standard i dyfishtë në zbatimin e ligjit nga institucionet.
/MALESIA.ORG/
