“Shqiptarët nuk i frikësohen e luftës, por kjo nuk është rruga qe e kanë zgjedhur”. Kështu i është përgjigjur Ministri i Punëve të Jashtme i Shqipërise Edmond Panariti presidentit të Serbisë Tomislav Nikolic për thirrjet e tij për luftë për Kosovën.
Komentet lidhur me këtë cështje Panariti i bëri gjatë homazheve në Prekaz ku u takua me përfaqësuesin e familjes Jashari, Muratin. “Nuk ka kërcënim që mund t’i frikësojë shqiptarët, por kjo nuk është rruga që mund të zgjidhen problemet. Shqiptarët edhe në luftë kanë treguar se janë popull paqedashës që dëshiron të bashkëjetojë me fqinjët dhe asnjëherë nuk kanë qenë agresor, ndaj dëshirojmë të vazhdojmë këtë frymë”, tha kryediplomati shqiptar në Prekaz.
Panariti është pritur edhe nga Kryeparlamentari kosovar Jakup Krasniqi, dhe dy zëvendëskryeministrat e qeverisë së Kosovës, Behxhet Pacolli e Sllobodan Petroviç. Në këto takime është diskutuar për mundësitë e rritjes së bashkëpunimit reciprok, sidomos në zhvillimin ekonomik.
Sic njofton zyra e kryetarit Krasniqi, Panariti i ka oftruar mbështetje të plotë funksionalizimit të zyrës administrative në veri. Ndërkaq në takimin me zëvendëskryeministrin Pacolli, është folur edhe për tarifën e çimentos. Pacolli e ka arsyetuar vendimin duke thënë se nuk është ndërmarrë kundër eksportit shqiptar, por për mbrojtjen e tregut vendor nga monopoli. /Top Channel/
