Nikollë Camaj dorëzon propozimin për hetim parlamentar mbi aksionin “Fluturimi i Shqiponjës”
Podgoricë, 1 qershor 2026 – Nënkryetari i Kuvendit të Malit të Zi dhe deputeti i Forumit Shqiptar, Nikollë Camaj, ka dorëzuar zyrtarisht propozimin për hapjen e një hetimi parlamentar lidhur me aksionin policor “Fluturimi i Shqiponjës”, të zhvilluar më 9 shtator 2006.
Propozimi parasheh formimin e një Komisioni Anketues, i cili do të ketë për detyrë mbledhjen e informacioneve dhe fakteve mbi veprimet e organeve shtetërore dhe subjekteve të tjera të përfshira në këtë aksion.
Duke njoftuar për dorëzimin e iniciativës, Camaj theksoi se zbardhja e plotë e ngjarjeve të 9 shtatorit 2006 është një detyrim institucional dhe moral.
“Sot, në emër të përgjegjësisë shtetërore dhe të së vërtetës historike, dorëzova propozimin për hapjen e hetimit parlamentar mbi aksionin policor ‘Fluturimi i Shqiponjës’. Një shtet i drejtë ndërtohet mbi transparencë, drejtësi dhe respekt për sakrificën e qytetarëve të vet. Zbardhja e plotë e fakteve nuk është vetëm detyrim institucional, por edhe obligim moral ndaj interesit kombëtar”, deklaroi Camaj.
Ai falënderoi gjithashtu deputetët dhe përkrahësit në Parlamentin e Malit të Zi që mbështetën këtë iniciativë, duke theksuar se synimi është sigurimi i drejtësisë dhe ndërtimi i një të ardhmeje mbi baza të barazisë dhe sundimit të ligjit.
Propozimi pritet të shqyrtohet në një nga seancat e ardhshme të Kuvendit të Malit të Zi, ku do të prezantohet dhe arsyetohet nga vetë deputeti Nikollë Camaj.
Malesia.org
