Komuna e Tuzit ka njoftuar zyrtarisht themelimin e Shërbimit të Mbrojtjes dhe Shpëtimit, një strukturë e re që do të jetë në dispozicion të qytetarëve 24 orë në ditë, me qëllim reagimin e shpejtë në raste emergjencash, zjarresh, aksidentesh dhe situatash të tjera të rrezikshme.
Themelimi i këtij shërbimi konsiderohet si një nevojë e domosdoshme për Malësinë, sidomos gjatë muajve të verës kur shpeshherë paraqiten zjarre në zona të ndryshme. Deri më tani, intervenimet janë mbuluar kryesisht nga ekipet e zjarrfikësve nga Podgorica, të cilat në shumë raste nuk kanë arritur të intervenojnë me kohë për shkak të distancës dhe rrethanave në terren.
Nga Komuna theksojnë se krijimi i këtij shërbimi është dëshmi e përkushtimit për ndërtimin e një komune më të organizuar, më funksionale dhe më të gatshme për t’u përballur me sfida të ndryshme që mund të paraqiten.
Në njoftim është shprehur mirënjohje për të gjithë ata që kanë kontribuar në realizimin e projektit, ndërsa suksese i janë dëshiruar komandantit Rexhep Çunmulaj dhe stafit të tij në misionin e ri në shërbim të qytetarëve.
/MALESIA.ORG/
