Deçiqi ka shënuar një fitore të rëndësishme 3:0 ndaj Otrant-Olimpikut në Ulqin, në kuadër të xhiros së katërt të Ligës së Parë të Malit të Zi, duke u ngjitur në krye të tabelës.
Ekipi nga Malësia e kontrolloi ndeshjen dhe përfitoi edhe nga epërsia numerike, pasi vendasit mbetën me dhjetë futbollistë që nga minuta e 20-të. Me karton të kuq direkt u ndëshkua Kaik Augusto Koreja Çagas, pas një ndërhyrjeje me dorë në duelin me Uroš Đuranovićin.
Deçiqi e shfrytëzoi avantazhin në pjesën e dytë. Në minutën e 66-të, Nikolla Braunoviq realizoi për 1:0 pas një goditjeje nga këndi.
Vetëm nëntë minuta më vonë, në minutën e 75-të, Balsha Radusinoviq dyfishoi epërsinë pas një kundërsulmi të nisur dhe të finalizuar me një pasim të saktë nga Davor Kontiq.
Fitoren e Deçiqit e vulosi Sinisha Stanisaviq, i cili në minutën e 89-të shënoi për rezultatin përfundimtar 3:0.
Me këtë fitore, Deçiqi regjistroi suksesin e tretë në katër ndeshje dhe tani ka 10 pikë, duke marrë kryesimin e tabelës. Otrant-Olimpiku mbetet me katër pikë pas katër xhirove.
Një start mjaft i mirë i sezonit për ekipin nga Malësia, i cili tashmë e sheh veten në krye të kampionatit.
/MALESIA.ORG/
