Mijëra studentë shqiptarë janë mbledhur sot në Shkup në një protestë të organizuar në mbrojtje të gjuhës shqipe dhe të drejtave të shqiptarëve në Maqedoninë e Veriut. Protesta po zhvillohet në qendër të kryeqytetit mes tensioneve të shtuara dhe pranisë së madhe të forcave policore.
Këtyre protestave i janë bashkuar dhe studentët shqiptarë nga Kosova, ndërsa ata nga Shqipëria vijojnë të jenë të bllokuar.
Sipas raportimeve të fundit nga terreni, të paktën tre studentë shqiptarë janë arrestuar nga policia maqedonase gjatë protestës. Ende nuk janë bërë të ditura arsyet zyrtare të arrestimeve, ndërsa protestuesit kanë kërkuar lirimin e menjëhershëm të tyre.
Ndërkohë, studentët shqiptarë që ishin nisur nga Tirana për t’iu bashkuar protestës në Shkup, janë ndaluar në kufi nga autoritetet maqedonase. Sipas informacioneve paraprake, ata janë penguar të hyjnë në territorin e Maqedonisë së Veriut dhe janë kthyer në drejtim të Kumanovës.
Protestuesit kanë deklaruar se tubimi synon mbrojtjen e përdorimit dhe statusit të gjuhës shqipe, duke e cilësuar atë si një të drejtë themelore të shqiptarëve në vend. Ata kanë bërë thirrje për barazi, respektim të marrëveshjeve ekzistuese dhe ndaljen e çdo forme diskriminimi ndaj komunitetit shqiptar.
Situata në Shkup mbetet e tensionuar, ndërsa pritet reagimi zyrtar i autoriteteve maqedonase lidhur me arrestimet dhe bllokimin e studentëve në kufi.
/MALESIA.ORG/
