Prokuroria Themelore Shtetërore ka hedhur poshtë kallëzimin penal që Presidenti i Malit të Zi, Jakov Millatoviq, kishte paraqitur kundër Zëvendëskryeministrit Nik Gjeloshaj.
Në fillim të muajit gusht, Prokuroria në Podgoricë kishte hapur çështje pas pretendimeve të Presidentit Millatoviq se ishte kërcënuar nga Gjeloshaj, i cili sipas tij i kishte dërguar mesazhe kërcënuese dhe të papërshtatshme. Sipas Presidencës, këto veprime kishin ndodhur pasi Kreu i Shtetit kishte kthyer për rishqyrtim në Kuvend Ligjin për tatimin mbi pasuritë e paluajtshme.
Nga ana tjetër, Zëvendëskryeministri Nik Gjeloshaj e ka mohuar kategorikisht këtë version, duke deklaruar se bëhet fjalë për akuza të pavërteta dhe përpjekje për të shpërqendruar opinionin publik. Ai ka theksuar se ligji është kthyer për rishqyrtim për shkak të, siç tha ai, lidhjeve familjare të Presidentit me deputetin Nebojsha Vuksanoviq.
/MALESIA.ORG/
