Mengjesin e sotëm u nda nga jeta, në moshën 78 vjeçare, Mark Camaj, profesori i Universiteti dhe diplomati në pension dhe një nga intelektualët më të shquar shqiptarë në Mal të Zi.
Ai u diplomua në Fakultetin e Filozofisë, grupi i Filologjisë Klasike, në Universitetin “Kirili dhe Metodi” në Shkup.
Studimet pasuniversitare – “Historia Kulturore e Bregdetit Lindor të Adriatikut” i përfundoi në Dubrovnik, dhe masterin në Fakultetin e Filozofisë të Universitetit të Zagrebit me temën “Kontaktet gjuhësore dhe karakteristikat e të folurit të malësorëve”.
Ndërsa, mbrojti tezën e doktoraturës – “Onomastika e Malësisë” në Fakultetin e Filologjisë, në Universitetin e Beogradit.
Gjatë karierës së tij, ai punoi si profesor i latinishtes në gjimnazin “25. Maj” në Tuz, shkollën e Mjekësisë në Podgoricë, punoi si bashkëpunëtor kërkimor në Institutin Historik të Republikës së Malit të Zi, pastaj në Universitetin e Malit të Zi – në Fakultetin e Filozofisë në Nikshiq dhe në Fakultetin e Mjekësisë në Podgoricë, ku ligjeroi greqishten e vjetër dhe latinishten. Gjithashtu ligjeroi të njëjtat lëndë në gjuhën shqipe në Universitetin e Prishtines dhe në Seminarin Dioqezan “Zoja e Këshillit të Mirë” në Shkodër.
Ai ishte bashkëpunëtor i Akademisë së Shkencave dhe Arteve të Malit të Zi.
Në vitin 2004-2006, ishte emëruar Ambasador i Unionit Shtetëror të Serbisë dhe Malit të Zi në Shqipëri, nga radhat e kuadrove jopartiak.
Malesia.org
