Sot me iniciativë të Këshillit Kombëtar të Shqiptarëve në Malin e Zi, në hotelin “Mediteran” në Ulqin, u mbajt takimi i përfaqësuesve të subjekteve politike të shqiptarëve në Malin e Zi, me qëllim të përafrimit të qëndrimeve për pjesëmarrje të përbashkët në zgjedhjet e ardhshme parlamentare që do të zhvillohen më 30 gusht 2020.
Në takim kanë qenë prezent kryetarët e subjekteve: Forca e Re Demokratike, Nazif Cungu, Alternativës Shqiptare, Nik Gjeloshaj, Lidhjes Demokratike Shqiptare, Nikollë Camaj, Lidhjes Demokratike në Mal të Zi, Saubih Mehmeti, Lëvizjes Perspektiva, Amir Hollaj dhe Unioni i Tuzit, Fadil Kajoshaj.
Në takim nuk ishin prezent kryetari i Partisë Demokratike, Fatmir Gjeka dhe kryetari i Unionit Demokratik të Shqiptarëve, Mehmed Zenka.
Pjesëmarrësit në takim kanë diskutuar dhe janë shprehur se bien dakord për pjesëmarrje të unifikuar në zgjedhjet e ardhshme parlamentare, duke iu bërë ftesë edhe atyre që nuk ishin të pranishëm në tryezë, të bëjnë përpjekje për bashkim. Këshilli Kombëtar edhe në ditët në vazhdim do të përpiqet për ta jetësuar këtë qëllim fisnik kombëtar, për unifikimin e subjekteve kombëtare në sfidat e ardhshme politike, kumtuan nga KKSH.
Malesia.Org
