Sot, më 17 janar 2014 mbushen 546 vjet nga vdekja e Gjergj Prijësit të shqiptarëve, Gjergj Kastriotit (Skënderbeu). Ai lindi më 6 maj 1405. U mor peng si nizamë pas thyerjes së të atit nga Sulltan Murati më 1421 dhe u dërgua në oborrin e Sulltanit në Adrianopojë. Pas mbarimit të shkollës ushtarake në Turqi, Gjergj Kastrioti “(Skënderi)” kreu detyra ushtarake në Ballkan e në Azinë e Vogël, duke u dalluar për trimëri dhe për këtë arsye iu dha titulli bej që do të thotë princ ose fisnik pra Skënderbeg do të thotë Aleksandri princ ose fisnik. Ikë nga Turqia e vihet në krye të shqiptarëve, të cilët i udhëhoqi në fitore për 25 vjet. Në janar të vitit 1468 Skënderbeu u sëmur gjatë zhvillimit të një Kuvendi të thirrur nga ai, në të cilin ishin të ftuar të gjithë princat shqiptarë. Vdiq me 17 Janar 1468 në Lezhë. I mbuluar me lavdi, ai u varros në Lezhë. /Telegrafi/
NAIM FRASHËRI
Kruj’, o qytet i bekuar!
Prite, prite Skënderbenë,
Po vjen si pëllump i shkruar,
Të shpëtonjë mëmëdhenë
Shqipëtarët t’i shpëtonjë
Nga xgjedh’ e keq’e Tyrqisë,
Edhe ty të të nderonjë,
Që je krej’i Shqipërisë,
Ka pas trima shqipëtarë,
Që s’u trembet syri kurrë,
Ndë zëmërt të tij ka zjarrë,
Ësht’ i urt’ e trim e burrë.
Mirë se erdhe, o verë!
Që na prure mirësinë,
Dhe për shumë vjet të tjerë
E zbukurofsh Shqipërinë.
O Shqipërizë! gëzohu,
Se të erdhi prapë dita,
Lulëzohu, zbukurohu,
Të zbriti nga Zoti drita!
Edhe juve, o të vdekur,
Merri ngaha ky gas pjesë,
Që shkuatë buzëpjekur,
Nd’atë jetë, paçi ndjesë!
O moj vash’ e Shqipërisë,
Që më rri duke mejtuar,
Pa i xhvish rrobat’ e zisë,
Arriti dit’ e uruar.
Zbardhi fusha, ndriti mali
Nga armët’ e trimërisë,
Hingëllint’e s’mbahej kali,
Që sill mbren’ e Shqipërisë
Trimatë bashkë me mbretnë,
Me nxit posi vetëtimë,
U futn’ e zunë qytetnë
Me të madhe kërcëllimë.
Turqit, q’e kishin qytetnë,
Papandehurë e panë
Që u dha si drita, mbretnë,
Pa s’hapnë goj’ e gjë s’thanë
Se fjala po q’u dëgjua,
Që vinte i bir’i mbretit,
Shqipërija u lëshua
Edhe ju derdhë qytetit;
Burrat trima më s’mënuan,
Gjith’ u mblodhë posi reza,
Kryeqytetn’ e rrethuan,
Armikn’ e preu e zeza.
Zjente bota, tundej dheu,
U ngrit gjithë Shqipërija,
Duke thën’: “Erth Skënderbeu,
Erdhi vetë Perëndija.”
Mysliman’ e të krishterë
U derdhë për mëmëdhenë,
E kishin të bashkë nderë
Si vëllezërë që qenë
ISMAIL KADARE
Portreti i Skenderbeut.
Si ditë e plotë ai shtjellej
Me re dhe erë përmbi atdhe.
Një emër Gjergj e kish si diellin
Tjetrin si hënën, Skënderbe.
Dy brirë dhie kish mbi krye
Emblemë e vjetër e çuditshme
Sikur ta dinte që mes brirëve
Dy perandorë do të godiste.
Njëzet e katër luftëra bëri
Njëzet e katër vdekje theu
Çka mangut linte ditën Gjergji
Plotësonte natën Skënderbeu.
Pas vdekjes eshtra iu ndanë
Në mijëra varre ata u shtrinë
Gjithçka të shumtë ai e pati
Të vetme kish veç Shqipërinë.
