Për tre ditë, më 21, 22 dhe 23 gusht, Vitoja e Malësisë së Madhe u kthye në një prej pikëtakimeve më të rëndësishme të folklorit, traditës dhe trashëgimisë kulturore shqiptare, me zhvillimin e Festivalit Mbarëkombëtar të Folklorit “Rapsha 2026”.
Festivali, i organizuar nga SHKA “Rapsha”, mblodhi shoqëri kulturore, ansamble dhe grupe folklorike nga Malësia, Kosova, Shqipëria, Maqedonia e Veriut, Lugina e Preshevës, Gucia dhe Diaspora. Në skenën e festivalit u prezantuan këngë, valle, veshje dhe tradita të ndryshme nga trevat shqiptare, duke dëshmuar pasurinë dhe larminë e trashëgimisë sonë kulturore.
Në festival morën pjesë rreth 20 shoqëri dhe grupe folklorike, ndërsa në programin treditor u prezantuan:
SHKA “Rapsha” nga Drume, Hot, Malësi e Madhe; SHKA “Malësori” nga Gjonaj, Prizren; SHKA “Besa” nga Trieshi; Shoqata Kulturore “Skampa” nga Elbasani; Grupi Folklorik “Gjergj Araniti” nga Mallakastra; SHKA “Karadaku” nga Gjilani; Ansambli “Krahui Shqiponjës” – Taip Madani nga Vlora; SHKA “Dedë Gjon Luli” nga Traboini, Hot; SHKA “Zëri i Luginës” nga Bujanoci e Presheva; SHKA “Maja e Karanfilit” nga Gucia; Grupi “Gjergj Kastrioti” nga Michigan; AFA “Rugova” nga Rugova; SHKA “Liria” nga Mileshi; SHKA “Pjetër Bogdani” nga Kruma e Hasit; AKV “Mati” nga Mati; AAKV “Kastrioti” nga Ferizaj; AKV “Deçani” nga Deçani; Ansambli Folklorik “Art Beseduhja” nga Lezha dhe SHKA “Jahi Hasani” nga Çegrani i Gostivarit.
Pjesëmarrja e grupeve nga diaspora, veçanërisht nga Shtetet e Bashkuara të Amerikës, i dha festivalit një dimension të veçantë, duke dëshmuar lidhjen e fortë të mërgatës shqiptare me vendlindjen, traditën dhe kulturën kombëtare.
Një nga momentet më të veçanta të festivalit ishte defilimi i grupeve folklorike nëpër qendrën e Tuzit. Grupet, të veshura me kostume tradicionale, sollën atmosferën e festivalit, ndërsa më pas programi vijoi në Vitojë.
Për tre net me radhë, skena në Vitojë u mbush me këngë e valle tradicionale, duke krijuar një atmosferë festive dhe duke afruar publikun me vlerat e trashëgimisë folklorike shqiptare.
Në përfundim të festivalit u shpallën edhe fituesit e tre vendeve kryesore.
Vendi i parë iu dha Grupit “Gjergj Kastrioti” nga Michigani, vendi i dytë i takoi AKV “Mati” nga Mati, ndërsa vendi i tretë u fitua nga SHKA “Malësori” nga Gjonaj, Prizren.
Juria profesionale e festivalit u kryesua nga prof. dr. dhe akademik Zymer Neziri, nga Instituti Albanologjik i Prishtinës. Në përbërje të jurisë ishin edhe prof. dr. Hiriet Ziberi, nga Universiteti i Tetovës, dhe prof. dr. Albin Sadiku, nga Instituti Albanologjik i Prishtinës.
Juria vlerësoi paraqitjet artistike të grupeve pjesëmarrëse, interpretimin, ruajtjen e elementeve tradicionale, nivelin artistik dhe përcjelljen sa më autentike të folklorit të trevave shqiptare.
“Rapsha 2026” dëshmoi edhe një herë rëndësinë e festivaleve folklorike në ruajtjen dhe promovimin e identitetit kulturor shqiptar. Në një skenë të vetme u bashkuan artistë nga treva të ndryshme shqiptare dhe nga diaspora, duke e kthyer Vitojën në një vendtakim të traditës dhe kulturës mbarëkombëtare.
Përmes këngës, valles, kostumeve tradicionale dhe interpretimit artistik, festivali përcolli vlerat e trashëgimisë kulturore nga një brez te tjetri, duke forcuar lidhjet ndërmjet trevave shqiptare dhe mërgatës.
Pas tre netësh të mbushura me këngë, valle, ngjyra, traditë dhe emocion, Festivali Mbarëkombëtar i Folklorit “Rapsha 2026” u përmbyll me sukses, duke lënë pas një manifestim të rëndësishëm kulturor për Malësinë dhe gjithë hapësirën shqiptare.
Malesia.org
