Komuna e Tuzit do të vazhdojë edhe këtë vit me mbështetjen financiare për fëmijët që nisin klasën e parë.
Sipas njoftimit të Komunës, çdo nxënës që regjistrohet në klasën e parë në shkollat në territorin e Komunës së Tuzit do të përfitojë 100 euro, të destinuara për blerjen e mjeteve dhe materialeve shkollore.
Nga pushteti lokal bëjnë të ditur se kjo masë synon t’u lehtësojë familjeve shpenzimet që shoqërojnë fillimin e vitit të ri shkollor, si dhe të ofrojë mbështetje për fëmijët në hapat e tyre të parë në arsim.
“Me këtë mbështetje dëshirojmë t’ua lehtësojmë familjeve përgatitjet për vitin e ri shkollor dhe t’u urojmë vogëlushëve tanë fillim të mbarë e plot suksese”, thuhet në njoftimin e Komunës së Tuzit.
Komuna thekson se investimi në arsim dhe në brezat e rinj mbetet një nga prioritetet e saj, duke e konsideruar mbështetjen e fëmijëve si një investim të drejtpërdrejtë në të ardhmen e Malësisë.
Masa vjen në prag të fillimit të vitit të ri shkollor, duke ofruar një ndihmë konkrete për familjet e nxënësve më të vegjël.
/MALESIA.ORG/
