Fitorja e thellë e LVV-së, më shumë se PDK, LDK dhe AAK së bashku.
Lëvizja Vetëvendosje shënoi fitore bindëse në zgjedhjet e parakohshme parlamentare të 28 dhjetorit në Kosovë, me afro 50 për qind të votave, sipas rezultateve preliminare të Komisionit Qendror të Zgjedhjeve (KQZ). E dyta doli Partia Demokratike e Kosovës (PDK) me mbi 21 për qind, pasuar nga Lidhja Demokratike e Kosovës (LDK) me rreth 14 për qind dhe Aleanca për Ardhmërinë e Kosovës (AAK) me rreth 6 për qind të votave. Dalja në zgjedhje ishte rreth 45 për qind, më e lartë sesa në zgjedhjet e 9 shkurtit të këtij viti.
Kreu i LVV-së, Albin Kurti, shpalli fitoren në zgjedhjet e 28 dhjetorit dhe tha se kjo është fitorja “më e madhe në historinë e vendit”.
“Më 9 shkurt fitoi LVV-ja me partnerët, më 28 dhjetor fitoi populli i Kosovës dhe Republika”, tha Kurti.
Kurti tha se partia e tij është në rrugë që të tejkalojë rezultatin e 14 shkurtit 2021, kur kishte fituar 50.2 për qind.
Sipas tij, rezultati zgjedhor i së dielës kërkon që duhet të ecet përpara pa vonesa.
“Sa më parë që certifikohen [rezultatet], aq më shpejt na duhet të krijojmë institucionet dhe të vazhdojmë me punën e mirë”, tha Kurti.
