Nëse arrihet marrëveshja midis Komunës së Tuzit dhe Kryeqytetit për ndërtimin e vaskës së pestë sanitare në deponinë e mbeturinave, Komuna e Tuzit duhet të ketë përfitime konkrete nga ky projekt – në menaxhim, punësim dhe përqindje nga pagesat e komunave të tjera që hedhin mbeturinat aty. Kështu deklaroi për “Dan” Nikollë Camaj, nënkryetari i Kuvendit të Malit të Zi. Ai theksoi se nuk mjafton që Tuzit t’i lejohet të shkarkojë mbeturinat falas në “Deponi”, pasi objekti ndodhet në territorin e saj.
“Deponia është në territorin e Komunës së Tuzit dhe ne duhet të kemi përfitime prej saj. Nëse arrihet marrëveshja për ndërtimin e vaskës sanitare, Tuzi duhet të ketë përfitime sepse është projekt në territorin tonë. Vaska duhet të jetë sipas standardeve, pa dëm për qytetarët, por edhe me përfitim për Komunën – qoftë përmes punësimeve apo përqindjes nga pagesat e qyteteve të tjera. Nuk mundet që vetëm Podgorica të përfitojë,” u shpreh Camaj.
Ai kujtoi se për dy vite rresht Tuzi ka paguar rregullisht për deponimin e mbeturinave, gjë që sipas tij është e papranueshme.
Camaj theksoi se kërkesat e banorëve duhet të merren seriozisht dhe se ai është në anën e tyre. “Duhet të bisedohet me ta në mënyrë serioze dhe të gjendet një zgjidhje e drejtë. Nëse projekti shkon përpara, duhet të ketë marrëveshje të qartë me Podgoricën dhe përfitime të qarta për Tuzin,” u shpreh ai.
/MALESIA.ORG/
