Me iniciativë të përbashkët të Këshillave Kombëtare Shqiptare në Mal të Zi dhe në Serbi, në kuadër të Memorandumit të Bashkëpunimit ndërmjet tyre, u realizua një vizitë e të rinjve nga Lugina e Preshevës në trevat shqiptare të Malit të Zi.
Të rinjtë fillimisht u pritën në selinë e Këshillit Kombëtar të Shqiptarëve në Mal të Zi, ku u mirëpritën nga kryetari, z. Faik Nika. Në fjalën e tij përshëndetëse, Nika theksoi rëndësinë e njohjes dhe bashkëpunimit mes të rinjve shqiptarë nga treva të ndryshme.
“Në kuadër të aktiviteteve të rregullta të Këshillit, e shoh të domosdoshme zhvillimin e takimeve të përbashkëta mes të rinjve shqiptarë. Kemi filluar këtë nismë me shpresën që të ketë vazhdimësi dhe që vizitat e ndërsjella të rinisë të ndihmojnë në krijimin e urave lidhëse ndërmjet nesh,” – u shpreh Nika.
Gjatë qëndrimit në Ulqin dhe Tuz, pjesëmarrësit u takuan me bashkëmoshatarë, organizata shqiptare dhe përfaqësues të institucioneve, përfshirë Këshillin Kombëtar Shqiptar, ministra shqiptarë, deputetë dhe kryetarë komunash. Ata gjithashtu vizituan vende me rëndësi kulturore e historike, duke u njohur nga afër me trashëgiminë shqiptare në Mal të Zi.
Kryetari Nika falënderoi bashkëpunëtorët që ndihmuan në realizimin e këtij projekti: Gzim Muratin nga shoqata “The Future”, Besfort Sulejmanin, koordinator i Zyrës për të Rinjtë në Preshevë, Nazif Veliqin, kryetar i OJQ-së “Horizonti i Ri”, dhe Ilir Gojçajn, kryetar i OJQ “Alb Progress”.
Ky projekt shënon një tjetër hap në zbatimin e marrëveshjes së bashkëpunimit ndërmjet dy këshillave kombëtarë shqiptarë, me qëllim që të forcohet ndërlidhja institucionale dhe të nxitet pjesëmarrja aktive e të rinjve në jetën shoqërore e kombëtare.
/MALESIA.ORG/
