Kuvendi i Shqipërisë miratoi programin dhe përbërjen e qeverisë së re të kryesuar nga Kryeministri Edi Rama, pas zgjedhjeve parlamentare të 11 majit 2025, ku Partia Socialiste fitoi mandatin e katërt qeverisës. Vendimi “Për miratimin e programit politik dhe përbërjes së Këshillit të Ministrave” u miratua me 82 vota pro nga 140 deputetë.
Seanca, që zgjati rreth 28 minuta, u shoqërua me debate dhe tensione. Konflikti nisi kur kryeministri Rama kërkoi që Kuvendi të shfaqë një mesazh nga ministra e krijuar nga Inteligjenca Artificiale, Diella. Deputetët e opozitës e kundërshtuan këtë paraqitje, duke e quajtur antikushtetuese, dhe për disa minuta bllokuan foltoren, duke hedhur edhe sende ndaj anëtarëve të Këshillit të Ministrave.
Sipas dekreteve të Presidentit Bajram Begaj, përbërja e kabinetit të ri është si më poshtë:
- Zëvendëskryeministre dhe Ministre e Infrastrukturës dhe Energjisë: Belinda Balluku
- Ministre e Punëve të Brendshme: Albana Koçiu
- Ministre për Evropën dhe Punët e Jashtme: Elisa Spiropali
- Ministër i Mbrojtjes: Pirro Vengu
- Ministër i Financave: Petrit Malaj
- Ministër i Turizmit, Kulturës dhe Sportit: Blendi Gonxhja
- Ministër i Mjedisit: Sofjan Jaupaj
- Ministre e Arsimit: Mirela Kumbaro Furxhi
- Ministre e Shëndetësisë dhe Mirëqenies Sociale: Evis Sala
- Ministre e Ekonomisë dhe Inovacionit: Delina Ibrahimaj
- Ministër i Drejtësisë: Besfort Lamallari
- Ministër i Bujqësisë dhe Zhvillimit Rural: Andis Salla
- Ministër i Shtetit për Pushtetin Vendor: Ervin Demo
- Ministre e Shtetit për Administratën Publike dhe Antikorrupsionin: Adea Pirdeni
- Ministër i Shtetit për Marrëdhëniet me Parlamentin: Toni Gogu
- Ministre Shteti dhe Kryenegociatore me Bashkimin Evropian: Majlinda Dhuka
Pas ceremonisë së betimit në Presidencë, kabineti i ri do të fillojë zyrtarisht detyrën, duke hapur një kapitull të ri në qeverisjen e vendit.
/MALESIA.ORG/
