Shkruan: Gjekë Gjonaj
Një shembull i mirë që me sukses ia arriti të realizojë rezultate mbresëlënëse biznesi në Mal të Zi është Anton Vulaj nga Tuzi, zona e Malësisë së Madhe. Ai sot me stafin e kompanisë së vet “Castellana Co” arriti të forcojë pozicionin e saj udhëheqës si lider në shpërndarjen e pjesëve të automobilave dhe shërbimeve në tregun malazez. Falë shpirtit të tij sipërmarrës kjo kompani u rrit në një simbol të besueshmërisë dhe inovacionit në industrinë e automobilave.
Për rezultatet e biznesit, të arritura në vitin 2024, Shoqata e Menaxherëve të Malit të Zi ( AMM) i ka ndarë Anton Vulajt, themelues dhe drejtor ekzekutiv i “Castellana Co”, çmimin më prestigjioz të biznesit në nivel të shtetit – Menaxher i Vitit në kategorinë e ndërmarrjeve të mesme, si një njohje profesionale për ndihmesën e tij personale në zhvillimin e ekonomisë dhe menaxhimit malazez. Ky aktivitet tradicional u mbajtpak ditë më parë në Podgoricë nën patronazhin e Qeverisë, ku morën pjesë gati 400 personalitete, përfshirë përfaqësues të Qeverisë, autoriteteve lokale, trupit diplomatik, organizatave të biznesit, kompanive dhe medias.
Vulaj shprehet krenar dhe i lumtur me këtë arritje, të cilën modestisht ia dedikon stafit të tij, që përbëhet nga 180 punonjës.
“E vlerësoj shumë dhe është nder për mua që u përzgjodha menaxher i vitit nga kjo shoqatë kaq prestigjioze në Mal të Zi, e cila ndanë çmime vjetore për menaxherët, sipërmarrësit dhe punëdhënësit më të suksesshëm për rezultatet e biznesit të arritura gjatë vitit të kaluar. Duke pasur parasysh se sa e fuqishme është industria e automobilave ku ne punojmë, të them të drejtën ky çmim ka qenë mjaft surpizues për mua, por në të njëjtën kohë u ndjeva shumë krenar dhe i lumtur që puna ime u vlerësua maksimalisht. Çmimi i sivjetshëm e ngriti edhe më lartë imazhin tim dhe të kompanisë. Shpërblimin, edhe pse individual, unë e shoh si vlerësim i një pune të gjatë dhe bashkëpunim të mirë me stafin tim të kompanisë. Kam një staf të shkëlqyer, që bën një punë të mrekullueshme dhe kolegë që punojnë në pozicione të ndryshme, që kanë dhënë një ndihmesë shumë të madh për të arritur deri këtu”, thekson Vulaj.
“Castellana Company” ekziston që nga viti 1998, kurse si një servis familjar në Tuz u themelua që në vitin 1964. Me kalimin e kohës, kompania u zhvillua, kështu që arriti të ketë 20 objekte ( dyqane) shitjeje ne pakicë, pothuaj në të gjitha komunat në Mal të Zi, duke u bërë kështu rrjeti më i madh i shitjes me pakicë të gomave, pjesëve dhe pajisjeve të automjeteve.
Kjo kompani e suksesshme ofron në të gjithë vendin produkte nga marka dhe shërbime të njohura të botës, si riparime mekanike, rregullim marshesh, ndërrim vaji dhe balancim gomash. Selia e kompanisë është në Tuz, ku menaxhmenti përqendrohet në transformimin digjital, efikasitetin operacional dhe rritjen e qëndrueshme. Kompania ofron një gamë të gjerë produktesh dhe shërbimesh të krijuara për të përmbushur më së miri nevojat e konsumatorëve.
“Ne jemi krenarë të themi se në çdo dyqan “Castellana Company” në të gjithë Malin e Zi klientët tanë do të gjejnë gjithmonë të njëjtin standard shërbimi të dedikuar, të njëjtat produkte të një cilësie më të lartë si dhe përkushtimin e një stafi profesional i cili është i gatshëm të mbështesë çdo problematikë apo kërkesë të tyre.
Si anëtare e rrjetit global NEXUS Automotive International, “Castellana Company”, ndjek në mënyrë aktive trendet botërore dhe zbaton standardet më të larta. Kompania investon vazhdimisht në modernizim, edukim të stafit dhe zgjerim të ofertës. Përmes më shumë se dy dekadash biznesi, kompania jonë i mbetet besnike misionit të saj – të ofrojë shërbim të nivelit të lartë, të ndërtojë besim dhe të jetë lider në industrinë automobilistike të Malit të Zi. Përveç kësaj, kompania jonë po zbaton në mënyrë aktive një strategji zgjerimi me qëllim përmirësimin e mëtejshëm të ofertës dhe pranisë së saj në treg. Ajo gjithashtu planifikon të zgjerojë biznesin e saj përtej kufijve të Malit të Zi në tregjet e vendeve të rajonit. Strategjia e rritjes së “Castellana Company”, synon ta pozicionojë kompaninë si një partner të besueshëm në industrinë e automobilave në të gjithë Ballkanin”, thekson Vulaj , duke treguar se në këtë drejtim gjatë tri viteve të ardhshme planifikon të investojë 15020 milionë euro, prej të cilave 70 për qind në Mal të Zi dhe 30për qind jashtë shtetit.
Misioni i kompanisë është të ndërtojë dhe të mirëmbajë marrëdhënie afatgjata biznesi me konsumatorët e vet, duke ofruar shërbime të shpejta dhe cilësore, të përshtatura sipas kërkesave individuale. Ajo synon ë ngjallë siguri dhe besim tek dhjetëra-mijëra konsumatorë, të cilët aktualisht i ka në sistem, me ofrimin e shërbimeve me cilësi të lartë, disponueshmëri dhe besueshmëri.
“Përpiqemi të plotësojmë nevojat dhe dëshirat e tyre dhe në këtë mënyrë të gjithë bëhemi më të suksesshëm. Pranojmë përgjegjësi personale dhe përpiqemi të jemi gjithmonë të ndryshëm, më të mirë dhe të inkurajojmë progresin”. u shpreh Vulaj.
Ai shton se vizioni ynë është që të arrijnë standardet me të cilat masim vendimet dhe veprimet tona, të jemi një kompani moderne, inovative dhe efikase që ofron shërbim superior dhe kontribuon në një cilësi më të lartë jetese për klientët tanë. “Kompleksi ynë në Tuz flet shumë për këtë, ku kemi gjithçka në një vend – shërbim, shitje me pakicë dhe shumicë. Nëpërmjet përvojës, besueshmërisë dhe vizionit kompania jonë synon të nxisë një mentalitet të ri për rritjen e biznesit të ndershëm, brenda rregullave ligjore të shtetit”, pohon Vulaj .
Rrugëtimi i këtij sipërmarrësi malësor shqiptar me përvojë dhe të suksesshëm në biznes nuk ishte aspak i lehtë sidomos, gjatë periudhës së tranzicionit, viteve të trazuara dhe të pavolitshme, të paqëndrueshme dhe pa rregulla të sakta për zhvillimin e biznesit në Mal të Zi. Megjithatë ai sot falë aftësive të tij drejtuese dhe punës me nder e përkushtim gëzon një autoritet të madh në mesin e të gjithë menaxherëve, sipërmarrësve dhe punëdhënësve në Mal të Zi dhe më gjerë. Çmimi i sivjetshëm e ngriti edhe më lartë imazhin e tij dhe të kompanisë të cilën e drejton me sukses.
As ai vetë, ndoshta, nuk do ta kishte besuar dy dekada e gjysmë më parë, po t’i kishin thënë se një djalë i ri nga Tuzi (Malësia), do të bëhej një nga sipërmarrësit më të njohur në vend, duke sfiduar të gjitha vështirësitë dhe pengesat e kohës. Për sukseset e tij në fushën e industrisë së automobilave është vlerësuar edhe më parë me çmime të larta, ndër të cilat veçojmë çmimin e kompanisë gjermane “ Boch” , “ kompanisë “ Forbs” dhe të grupacionit “ Nexus”.
Anton Vulaj, përveçse si sipërmarrës i suksesshëm, është i njohur edhe si filantrop ( bamirës) jo vetëm për komunitetin tonë, por për të gjitha komunitetet tjerabrenda dhe jashtë vendit pa dallim kush janë dhe prej nga janë për të cilat, nga thjeshtësia e tij, nuk dëshiron të flasë.
Falë motivacionit, strategjisë, vizionit, punës së palodhur me përkushtim, gjatë së cilës ai natyrshëm ka pasur rënie dhe ngritje, është një model dhe frymëzim për brezat e rinj për të krijuar një jetë më të mirë me dinjitet.
