Kryetari i Komunës së Tuzit, Lindon Gjelaj, ka deklaruar se nuk do të lejojë që të imponohen zgjidhje që lidhen me territorin e Tuzit dhe se është hequr nga fuqia projekti urbanistik “Deponia sanitare me qendër riciklimi”, me çka është vënë qartë pikë përpjekjeve për planifikim të njëanshëm, thuhet në deklaratën e tij.
Lexo deklaratën e plotë:
Me rastin e veprimeve të paligjshme të Kryeqytetit të Podgoricës dhe ndërmarrjeve publike të veta, duke shkelur dispozitat elementare të Ligjit për vetëqeverisjen lokale dhe Ligjit për organizimin territorial të Malit të Zi, duke vendosur për hapësira që pa dyshim i takojnë Komunës së Tuzit, theksoj si vijon:
Komuna e Tuzit nuk do të lejojë që askush, jashtëligjshëm dhe pa pëlqimin e komunës, të imponojë zgjidhje që kanë të bëjnë me territorin e Komunës së Tuzit.
Kushtet urbanistiko-teknike me numër 06-333/24-13399/8 të datës 07.11.2024, të lëshuara për ndërtimin e deponisë sanitare në parcelat që ndodhen ekskluzivisht në territorin e Komunës së Tuzit, paraqesin ndërhyrje të pacipë në kompetencat e komunës. Edhe më e papranueshme është fakti që akte të tilla merren pa asnjë dijeni të Komunës së Tuzit.
E kujtoj opinionin publik dhe organet kompetente se Kuvendi i Komunës së Tuzit, që më 28 dhjetor 2023, ka marrë Vendim për heqjen nga fuqi të Projektit Urbanistik „Deponia sanitare me qendër riciklimi“, me çka është vënë pikë përfundimtare ndaj të gjitha përpjekjeve për planifikim arbitrar në territorin tonë nga ana e Kryeqytetit apo çdo subjekti tjetër.
Kërkojmë urgjentisht që Kushtet urbanistiko-teknike të anulohen menjëherë dhe i gjithë procedimi të ndalet.
Komuna e Tuzit do të parashtrojë kallëzime penale kundër personave përgjegjës që, jashtë kompetencave të tyre, në emër dhe për llogari të Komunës së Tuzit kanë lëshuar kushte urbanistiko-teknike, si dhe leje e miratime të tjera që pa dyshim i përkasin kompetencës ekskluzive të Komunës së Tuzit, duke ekzistuar dyshim i bazuar se kanë kryer vepra penale të keqpërdorimit të pozitës zyrtare dhe punës së pandërgjegjshme në shërbim.
Komuna e Tuzit nuk kërkon asgjë që nuk i takon, kërkon vetëm atë që është e veta. Dhe këtë nuk do ta marrë askush.
Dhe në fund, nëse këmbëngulin të vazhdojnë të shkelin ligjin, me të gjitha mjetet, së bashku me qytetarët, do të parandalojmë që të ndërtohet më tej në deponinë tonë.
Lindon Gjelaj
Kryetar i Komunës së Tuzit
