Një ndër ngjarjet kulturore më të rëndësishme që për vite të tëra është organizuar në qytetin e Ulqinit padyshim që është panairi i librit. Këtë vit organizimi i tij është vënë në pikëpyetje.
Në mbledhjen e ditës së enjte të kuvendit të Ulqinit, drejtori i Qendrës për kulturë të Ulqinit, z. Nail Draga paraqiti programin e punës së kësaj qendre ku nuk figuronte fare panairi i librit për këtë vit. Këtë çështje e vuri në dukje këshilltari nga radhët e UDSH-së, z. Astrit Hoxha.
Çështja e (mos)organizimit të panairit të librit këtë vit u trajtua edhe nga këshilltaret tjerë të kuvendit duke kërkuar që panairi të organizohet me çdo kusht.
Drejtori Draga u përgjigj se kjo çështje do të marrë përgjigje në dy ditët e ardhshme dhe se problemi është i natyrës teknike.
Drejtori i Qendrës për kulturë në programin e tij për vitin 2012 kishte të evidentuar edhe organizim për nder të 100 vjetorit të shtetit shqiptar dhe se organizimi për këtë kremtë ishte përmbledhur në një ekspozitë. Draga po ashtu kërkoi që edhe këshilltarët të kontribuojnë në mënyrë që programi të jetë më i pasur. /Ulqini Online/
