Me një ekspozitë kushtuar krijimtarisë dhe trashëgimisë artistike të Gjelosh Gjokajt, në Qendrën Kulturore-Informative “Malësia” në Tuz u shënua dhjetëvjetori i kalimit në amshim të njërit prej emrave më të shquar të artit pamor shqiptar dhe evropian.
Ekspozita, e titulluar “Një dekadë, një gjurmë e përjetshme”, mblodhi të enjten mbrëma artdashës dhe përfaqësues të fushave të ndryshme, të cilët nderuan jetën dhe veprën e artistit të madh nga Malësia.
Gjatë aktivitetit u rikujtuan etapat kryesore të rrugëtimit krijues të Gjokajt, duke filluar nga viti 1968, kur ai u largua nga Prishtina drejt Italisë. Atje, njohja me piktorin shqiptar Ibrahim Kodra shënoi një moment të rëndësishëm në zhvillimin e mëtejshëm të karrierës së tij artistike.
Sipas përfaqësuesve të QKI-së “Malësia”, përmes Kodrës, Gjokaj pati mundësinë të njihej me figura të njohura të artit dhe kulturës ndërkombëtare, ndërsa rrugëtimi i tij e lidhi me emra të mëdhenj si Pablo Picasso, Ernest Hemingway dhe skulptori kroat Anton Augustinçiq.
Në kujtesën e veprimtarisë së tij u përmendën edhe kontaktet me artistë të tjerë të njohur, përfshirë Renato Guttuson, Franco Gentilinin e Mario Martinën, si dhe takimet me aktoren e famshme italiane Sophia Loren dhe aktorin shqiptar Bekim Fehmiu.
Sead Gjokaj: Vepra e tij mbetet krenari për kulturën shqiptare, malazeze dhe evropiane
Për krijimtarinë dhe rëndësinë e Gjelosh Gjokajt në historinë e artit foli Sead Gjokaj, i cili e cilësoi atë si njërin prej krijuesve më të mëdhenj të artit pamor që ka pasur Mali i Zi.
Ai vlerësoi se kalimi i një dekade nga ndarja e artistit nga jeta nuk e ka zbehur vlerën e veprave të tij, por përkundrazi, ka dëshmuar qëndrueshmërinë dhe rëndësinë e trashëgimisë së tij.
Sipas tij, Gjokaj mbetet një artist me përmasa ndërkombëtare, krijimtaria e të cilit përfaqëson një pasuri të çmuar për kulturën shqiptare, malazeze dhe evropiane.
Nga Mileshi i vendlindjes, nëpër Beograd, Romë e deri në Augsburg, piktori ndërtoi ura artistike dhe kulturore, duke krijuar një gjuhë të veçantë shprehëse. Veprat e tij dallohen për fantazinë lirike, vizionet surrealiste dhe mjeshtërinë e jashtëzakonshme në grafikë.
Në pikturat e Gjokajt, figura dhe koka e njeriut shfaqen shpesh si elemente qendrore, përmes të cilave artisti përcjell reflektime mbi kujtesën, kohën, përvojën njerëzore dhe qëndrueshmërinë përballë vështirësive.
Megjithëse krijimtaria e tij u prezantua në të gjitha kontinentet dhe ai u vlerësua me çmime të rëndësishme ndërkombëtare, lidhja me vendlindjen mbeti një pjesë e pandashme e identitetit të tij artistik. Gjokaj kthehej vazhdimisht në atelienë e tij në Milesh, të cilën e konsideronte një burim të rëndësishëm frymëzimi.
Duke folur për domethënien e këtij përvjetori, Sead Gjokaj theksoi se artistë të përmasave të tilla vazhdojnë të jetojnë përmes veprave që lënë pas, duke u dhënë brezave të ardhshëm mundësinë të shohin botën përmes krijimtarisë së tyre.
Dhjetë vjet pas ndarjes nga jeta, Gjelosh Gjokaj vazhdon të mbetet një emër i rëndësishëm i artit bashkëkohor dhe një figurë përfaqësuese e kulturës së Malësisë, trashëgimia e të cilit kapërcen kufijtë lokalë dhe kombëtarë.
MALESIA.ORG
