Mospajtimet mbi kufirin administrativ mes Komunës së Tuzit dhe Podgoricës kanë bërë që çështja të shkojë në arbitrazh.
Për Malësinë, kjo ka peshë të veçantë, pasi lidhet drejtpërdrejt me territorin, pronat dhe kompetencat e komunës.
Që nga themelimi i Komunës së Tuzit, çështja e ndarjes së qartë territoriale ka qenë një nga temat më të ndjeshme. Mungesa e një marrëveshjeje përfundimtare ka lënë hapësirë për dilema mbi administrimin e zonave të caktuara dhe mbi të ardhurat që i takojnë komunës.
Dërgimi i çështjes në arbitrazh nënkupton se një trup i pavarur do të vendosë për vijën ndarëse dhe aspektet pronësore.
Banorët e Malësisë presin që vendimi të bazohet në parime ligjore dhe në realitetin historik e demografik të zonës, duke garantuar që Komuna e Tuzit të mos dëmtohet territorialisht apo financiarisht.
Në mbledhjen e fundit të Komisionit për Përcaktimin e Kufijve, kryetari i trupit, Naim Gjokaj, tha se “pika e pëngesës” ka qenë Deponia. Procesi i përcaktimit të kufijve ka zgjatur shtatë vjet dhe është i ndarë në dy pjesë: territori dhe pasuria.
“Përfaqësuesit e Kryeqytetit kishin vërejtje mbi disa pika territoriale, më së shumti pranë Deponisë “Livade”, dhe propozuan që kjo pjesë t’i takojë Podgoricës. Ky propozim nuk u pranua nga Komuna e Tuzit, duke penguar marrëveshjen. Për këtë arsye, e gjithë çështja do t’i besohet komisionit të arbitrazhit. Nuk u diskutuan Korita dhe Shtëpit Rakiq, sepse pengesa kryesore ishte Deponia. Ndarja e pasurisë nuk u trajtua ende”, tha Gjokaj.
/MALESIA.ORG/
