Në Kosovë është përuruar droni i parë luftarak i prodhuar vendshëm — “Skifteri”, vepër e kompanisë inovative “Future Minds Academy” nga Gjilani. Në ceremoninë e prezantimit mori pjesë edhe kryeministri në detyrë, Albin Kurti, i cili theksoi se Kosova po hyn në epokën e prodhimit vendor të teknologjisë mbrojtëse.
“Të ardhmen e industrisë së mbrojtjes dhe avancimit të dronëve luftarakë po e ndërtojmë edhe në Kosovë. Shteti ynë po shndërrohet në vend që prodhon,” – ka deklaruar Kurti, duke shtuar se në Gjilan vizitoi kompanitë “Future Minds Academy” dhe “MIGA SkyShield MAR”.
Droni “Skifteri” arrin lartësi deri në 5000 metra, ka hapësirë operuese prej 20 kilometrash dhe shpejtësi maksimale 270 km/h, ndërsa droni kamikaz “K1” fluturon deri në 2500 metra me shpejtësi 180 km/h.
Kurti theksoi se pas furnizimeve me dronët Bayraktar TB-2, Puma dhe Skydagger, Kosova do të vazhdojë investimet në siguri, mbrojtje dhe zhvillim të prodhimit vendor.
“Tash dronët luftarakë po i prodhojmë edhe vetë. Si qeveri, do të vazhdojmë ta mbështesim ngritjen e kapaciteteve dhe prodhimtarisë vendore në fushën e mbrojtjes,” – shtoi ai.
Edhe kryetari i Gjilanit, Alban Hyseni, e cilësoi këtë zhvillim si një hap frymëzues që dëshmon potencialin e të rinjve gjilanas.
“Ky është shembull shumë frymëzues dhe dëshmon që të rinjtë gjilanas janë kreativë dhe me vizion të qartë,” – tha Hyseni pas përurimit të dronit “Skifteri”.
Prodhimi i dronëve “Made in Kosova” shënon një moment të rëndësishëm për zhvillimin e industrisë së mbrojtjes dhe inovacionit teknologjik në Kosovë.
/MALESIA.ORG/
