Sipas një sondazhi të fundit të realizuar nga Qendra për Demokraci dhe të Drejtat e Njeriut (CEDEM), Partia Demokratike e Socialistëve (DPS) do të fitonte 25.8 për qind të votave nëse zgjedhjet parlamentare në Mal të Zi do të mbaheshin javën e ardhshme.
Në vendin e dytë renditet koalicioni serb “Për të Ardhmen e Malit të Zi” me 23.5 për qind, ndërsa Lëvizja “Evropa Tani” e Kryeminstrit Milljko Spajiq zë vendin e tretë me 20.3 për qind të mbështetjes së të anketuarve.
Në konferencën për shtyp, drejtoresha e CEDEM-it, Nevenka Vuksanoviq, tha se koalicioni serb “Për të Ardhmen e Malit të Zi” (ZBCG) ka shënuar rritje të ndjeshme të mbështetjes, ndërsa Lëvizja “Evropa Tani” (PES) ka pësuar rënie të konsiderueshme krahasuar me vitin 2023, kur kjo parti gëzonte mbështetjen e 29 për qind të votuesve.
Sa i përket partive nacionale shqiptare, Forumi Shqiptar gëzon 1.8 për qind mbështetje, UDSH-ja 0.8 për qind, ndërsa Forca 0.7 për qind.
Drejtoresha e CEDEM-it, Nevenka Vuksanoviq, ka bërë të ditur gjithashtu se 36 për qind e qytetarëve mendojnë se Mali i Zi po ecën në drejtimin e duhur, ndërsa 38 për qind besojnë se vendi po shkon në drejtim të gabuar. Rreth 25.9 për qind e të anketuarve nuk kanë qëndrim ose nuk e dinë.
Sondazhi është realizuar në periudhën nga 25 shtatori deri më 6 tetor të këtij viti.
/MALESIA.ORG/
