Kryetari i Komunës së Tuzit, Lindon Gjelaj, deklaroi sot se Ndërmarrja Publike “Deponia” po vepron pa miratimin e komunës për ndërtimin e një vaske të re sanitare në deponinë “Livade”.
Ai bëri thirrje të qartë ndaj drejtuesve të ndërmarrjes që të ndalojnë menjëherë çdo veprim të paligjshëm, duke paralajmëruar se në të kundërt do të ndërmerren të gjitha procedurat ligjore, përfshirë kallëzimet penale dhe njoftimin e institucioneve ndërkombëtare.
Sipas Gjelajt, deponia “Livade” ndodhet brenda territorit të Komunës së Tuzit, dhe çdo aktivitet që rrezikon shëndetin e banorëve dhe mjedisin përbën një sulm të drejtpërdrejtë ndaj komunitetit. Ai shtoi se shkatërrimi i hapësirës përreth deponisë, jashtë mureve të saj, është i papranueshëm dhe kërkon reagim të menjëhershëm.
“Kemi marrë një premtim gojor nga drejtori i Deponisë se veprimet e tilla do të ndalen, por është e qartë se deri tani premtimet nuk janë zbatuar. Komuna e Tuzit nuk do të tolerojë më mashtrime dhe injorim të interesave të qytetarëve tanë,” tha kryetari Gjelaj.
/MALESIA.ORG/
