Problematika që lidhet me kalimin e rrugës ndërkombëtare nëpër qendër të Tuzit është një problematikë e vjetër e cila kërkon zgjidhje.
Rruga kryesore e cila kalon për qendër të Tuzit, shërben edhe si rrugë ndërkombëtare, pjesë e korridorit ndërkombëtar E762, e cila lidh Malin e Zi me Shqipërinë dhe më tej me Kosovën dhe vendet e tjera të Ballkanit.
Kalimi nëpër qendër të Tuzit është i rënduar gjatë gjithë vitit, ndërsa gjendja përkeqësohet më shumë gjatë sezonit verorë, sidomos nga mjetet e rënda siç janë kamionët e autobusët.
Bllokimet në trafik vështirësojnë funksionimin normal dhe lëvizjen e qytetarëve vendas edhe për distanca të shkurtra, ku shpesh për të lëvizur disa metra, duhen disa minuta.
Situata të tilla mund të kushtojnë edhe jetë, pasiqë në situata emergjente, ndihma e shpejtë nuk ka alternativë të qarkullimit të shpejtë.
Tuzi si kryeqendra e Malësisë ka nevojë për një rrugë dytësore (bypass) që do të shmangte kalimin e trafikut të rëndë përmes qendrës së qytezës, ashtu siç e ka Bajza e Kopliku në anën tjetër të Malësisë.
Një rrugë ndërkombëtare nuk mund të kalojë përmes qendrës se një qyteze, me rrugë lokale më një korsi për drejtim.
Plani për një rrugë rrethqarkulluese (bypass) është përmendur shumë në vitet e kaluara por nuk është vepruar konkretisht.
/MALESIA.ORG/
