Nënkryetari i Komunës së Tuzit, njëheri edhe kryetari i këshillit komunal të Malësisë i LDSH-së, Ivan Ivanaj, permes rrjetit social facebook, flet mbi vendosjen e themeleve të Komunës së Tuzit dhe funksionalizimin e sherbimeve të Komunës.
Ivanaj, thekson se koalicioni qeverisës funksionon pa pengesa dhe në bazë të marrëveshjes dhe se me resurse të komunes menaxhojnë si shtëpiak të mirë, e jo si paraardhësit e tyre politik, të cilët, sipas Ivanaj, kishin vetëm një qëllim, përçarjen dhe shndërrimin e Komunës në çerdhe partiake.
Lexoni postimin e plotë të Ivanaj.
Si sot gjashtë muaj më parë, #ForumiShqiptar(ASH, LDSH, UDSH) filloi të qeveris me Tuzin. Pas fitores së bindshme të tre marsit, pa vonuar shumë, filluam t’ia vëmë themelet Komunës dhe, gjatë kësaj periudhe, arritëm t’i formojmë, por çfarë është më me rëndësi, edhe t’i funskionalizojmë shërbimet e shumta të Komunës. Pasi që hartuam dhe miratuam buxhetin, filluam hartimin dhe implementimin e projekteve, nga të cilat disa janë duke u realizuar, disa do të realizohen shumë shpejtë, kurse disa të tjera vitin e ardhshëm.
Koalicioni qeverisës funksionon pa pengesa dhe në bazë të marrëveshjes. Me resurset tona menaxhojmë si shtëpiak të mirë, e jo si paraardhësit tonë politik, të cilët kishin vetëm një qëllim, përçarje dhe shndërrim të Komunës në çerdhe partiake.
Ne, konstituentet e Forumit Shqiptar, jemi të vendosur dhe të përgatitur, që të përballemi me sfidat dhe sabotimet që na presin në këtë rrugëtim, ose më mirë të them mision, për të bërë Malësinë vend më të mirë për të jetuar.
Gjithashtu, jemi të vetëdijshëm se vetëm të bashkuar mund të bëjmë gjera të mira për Malësinë, dhe për shqiptarët në Malin e Zi.
Malesia.Org
