Sot, Kryetari i Komunës së Tuzit, Nik Gjeloshaj, Kryeparlamentari Fadil Kajoshaj, Ministri i Arsimit të Malit të Zi, Damir Shehoviq, bashkë me Drejtorin gjeneral për arsimin e pakicave, Marash Dukaj, si dhe drejtori i Drejtorisë për punë publike Reshad Nuhoxhiq, vizituan kopshtin e fëmijëve në Tuz.Punimet në kopshtin e fëmijëve, në Komunën e Tuzit, me vlerë prej 1,7 milion euro kanë përfunduar në afat të paraparë dhe nga 1 shtatori do të fillojnë punën.
Ministri i Arsimit të MZ, Damir Shehoviq theksoi se kopshti në Tuz është ndërtuar në kuadër të projektit me Bankën për zhvillim të Këshillit të Evropës (CED). Ai njekohësisht paralajmëroi edhe disa projekte tjera me këtë bankë.
Ndërsa, Kryetari i Komunës së Tuzit, Nik Gjeloshaj, potencoi marrëdhëniet e mira me Ministrinë e Arsimit, si dhe theksoi kontributin e Komunës, e cila mundësoi ndërtimin e kopshtit në pronën e sajë me vlerë prej 400 mijë euro si dhe lirimin nga takasat komunale lokale. Gjithashtu Komuna do të përfundojë të gjitha punimet në aksin rrugor përreth kopshtit.
“Do të vazhdojmë bashkëpunimin me Ministrinë dhe në ndërtimin e shkollës në Dheun e Zi. Jemi mirënjohës Ministrisë së arsimit dhe qeverisë së Malit të Zi për partneritet kur është fjala për projekte të tilla, në Komunën tonë”, deklaroi Gjeloshaj.
Ndërkaq, lidhur me këtë në faqen e vet në Facebook, drejtori gjeneral i arsimit për pakica, Marash Dukaj, shkruan se Kopshti i fëmijëve, është i ndërtuar me të gjitha standardet dhe do të ketë vend për afro 200 vogëlushë.
Sipas Dukaj, Objekti i kopshtit në Tuz përmban 11 dhoma pune, hapësirë multifunksionale, kuzhinën, ambiente për punonjësit si dhe përmbajtje të tjera të nevojshme.
Malesia.Org
