Nëntori për shqiptarët është muaji i krenarisë dhe lavdisë kombëtare; është muaji i kthimit të Kryetrimit, muaji i Alfabetit, muaji i Pavarësisë, muaji i Bacës Adem! Është muaji që pasuron dhe hijeshon bredhin e festave tona, me kartolinat e kujtesës kombëtare!
Armiqtë tonë përherë na deshën të ndarë! Të të ndarë, dhe të përçarë, dëshirojnë të na shohin edhe sot! Megjithatë, shqiptarët në përgjithësi, kurrë nuk kanë qenë me të fuqishëm. Por, kjo nuk do të thotë se duhet të kënaqemi, e të biem në gjum kolektiv. Të kënaqur do të jemi vetëm atëherë kur çështja shqiptare të zgjidhet, njëherë e përgjithmonë.
Ne, shqiptarët në Mal të Zi, si popull autokton në këto treva, si pjesë e pandashme e kombit shqiptar, nuk mund të jemi të kënaqur me pozicionin tonë. Kjo, falë edhe politikës sonë të mbrapshtë dhe neglizhencës, përçarjeve dhe ndarjeve, të cilat, natyrisht, përkrahen nga ata që e dinë se vetëm duke na përçarë, do të jenë zot shtëpie në trevat tona. Kjo ka për pasojë që, vetëm qytetet shqiptare në Malin e Zi, mbeten të pa-hijeshuara për festat tonë kombëtare! Deri kur!
Situata është alarmante, por ende nuk është vonë, që të gjithë ata që frymojnë shqip, e veçanërisht ata që janë pjesë e jetës publike, të reflektojnë, së pari si shqiptarë, e pastaj edhe si qenie njerëzore, dhe t’i lëmë anash të gjitha ndasitë, interesat, e madje edhe inatet, të cilat edhe na kanë sjellë në këtë situatë, dhe të provojmë, që të bashkuar, të arrijmë t’ua kthejmë shqiptarëve, vendin që u takon dhe e meritojnë.
Në emër të kësaj, shqiptarë kudo që jeni, shqiptarë që e ndieni veten shqiptarë, GËZUAR 28 NËNTORI, Dita e Pavarësisë !
LDSH
