Në redaksinë tonë kemi fituar një deklaratë për medie të Ambasadës së Shqipërisë në Mal të Zi, përmes të cilës përshëndetet marrëveshja e arritur në mes subjekteve politike shqiptare të cilat do të garojnë në zgjedhjet lokale në Malësi, e të cilat janë dakorduar që pas zgjedhjeve të bashkëveprojnë për formimin e shumicës në Kuvendin e Komunës së Tuzit.
DEKLARATË PËR MEDIA E AMBASADËS SË REPUBLIKËS SË SHQIPËRISË NË MAL TË ZI LIDHUR ME ZGJEDHJET NË KOMUNËN E TUZIT.
Ministria për Evropën dhe Punët e Jashtme e Republikës së Shqipërisë përshendet dhe mirëpret marrëveshjen e aktorëve politikë e shoqërorë në Tuz, Mali i Zi, për të bashkërenduar përpjekjet në mbrojtje dhe përfaqësim të interesave të shqiptarëve në Trevën e Malësisë gjatë procesit të zgjedhjeve për në Kuvendin e Komunës së Tuzit, që do të mbahen më 26 nëntor 2017.
Ministria për Evropën dhe Punët e Jashtme e Republikës së Shqipërisë mirëpret ndërgjegjësimin e faktorëve politikë e shoqërorë shqiptare në Malin e Zi për të nxjerrë mësime nga problemet, dasitë dhe dështimet e së kaluarës.
Ajo konsideron se angazhimi publik për të bashkuar zërin dhe forcat për të shfrytëzuar maksimalisht hapësirën e rregullave të lojës demokratike për të maksimizuar rezultatin përbën rrugën e duhur dhe mënyrën më të mirë për të realizuar të drejtat që u garanton ligji dhe kuadri ligjor në Malin e Zi dhe ai ndërkombëtar, në përputhje me pritshëmritë dhe kërkesat e popullsisë shqiptare për mirëqeverisje, progress dhe begati.
