Nga arkivat e shtetit turk janë gjetur dokumente të cilat tregojnë se Ulqini i është dhënë Malit të Zi në koncesion në një periudhë 100 vjeçare, deklaroi Koço Danaj për gazetën malazeze Dan.
Danaj sqaron se Ulqini duhet të bëhet qytet i lirë në mes Shqipërisë dhe Malit të Zi, dhe vazhdon, se “Ulqini nuk i është dhënë Malit të Zi në Kongresin e Berlinit, por ajo ndodhi disa vite më vonë”.
Sipas tij, qëllimi i peticionit dhe platformës së “Shqipërisë Natyrale” është shfuqizimi i vendimit të Konferencës së Londrës dhe njohja e aktit ligjor të 28 nëntorit të 1912, kur u shpall pavarësia e Shqipërisë në kufijtë e saj natyror. “Kjo është kërkesë plotësisht legjitime”, tha Danaj.
Ai sqaroi se qeveria e Shqipërisë inkurajoi shqiptarët që të votojnë për pavarësinë e Malit të Zi, por që qeveria malazeze nuk njeh të drejtat e shqiptarëve. Ai theksoi të drejtën e shqiptarëve për komunën e Tuzit, gjë e cila po pengohet nga qeveria malazeze.
Danaj përkujtoi se Mali i Zi ishte shtet i pavarur deri në vitin 1919, por në Konferencën e Versajës u vendos që pavarësia ti merret dhe të bashkohet një shteti serbo-kroat-slloven. Kjo ishte një padrejtësi e cila ju bë Malit të Zi, por e cila u përmirësua dekada më vonë, kur iu mundësua që përmes referendumit të rifitojnë pavarësinë. Prandaj, dhe kërkesa e shfuqizimit të vendimit të Konferencës së Londrës është e drejtë legjitime për padrejtësitë që u bënë ndaj shqiptarëve, sqaron ai.
Danaj vazhdon “edhe Hashim Thaçi dhe Sali Berisha para një viti, deklaruan se ata pajtohen me kufijtë e përcaktuara nga Kuvendi i Vlorës, me 28 nëntor 1912.
Ai sqaroi se është i njoftuar se edhe kreu i Iniciativës Qytetare nga Tuzi, Vasel Sinishtaj, publikisht mbështeti iniciativën e anulimit të vendimit i cili u pru në Konferencën e Londrës, ku shqiptarët u ndanë në 5 shtete, dhe vazhdon, “edhe Nimanbegu e Abazoviq të cilët publikisht u deklaruan se janë kundër, me zëmër e përkrahin këtë nismë” tha Danaj. /MALESIA.ORG/
