Ditë më parë, partia shqiptare Forca e Re Demokratike – Forca ka shprehur, nëpërmjet liderit të saj Nazif Cungu, i cili njëheri është edhe kryetar i komunës së Ulqnit dëshirën për të qenë pjesë e qeverisjes qendrore me koalicionin e tanishëm qeverisës.
Mundësia që kjo parti të hyjë në koalicion me partitë që qeverisin Malin e Zi, në nivelin qendror, për momentin ka gjasa të vogla që të ndodh. Kundër hyrjes së Forcës në qeveri në kushtet e tanishme u deklaruan DPS, partia kryesore në qeverinë e Malit të Zi, por edhe partia tjetër shqiptare UDSH e cila veç është pjesë e qeverisë.
Zëdhënësi i DPS Rajko Kovaçeviq e la të hapur rrugën për bashkëpunim me Forcën por pa harruar të përmend se edhe prej ku duhet nisur ky bashkëpunim.
‘’DPS është një parti që është e hapur për bashkëpunim me të gjithë ata që me neve ndajnë vlera të njëjta ose të ngjashme dhe në angazhimet strategjike programore tonat. Ky bashkëpunim i cili partia jonë ka me paritë tjera nuk do të thotë që të jetë vetëm në nivel shtetëror. Ne mund të bashkëpunojmë dhe në nivel lokal’’, tha Kovaçeviq.
Kundër hyrjes së Forcës në qeveri është deklaruar haptas edhe Ferhat Dinosha, ministër aktual në qeverine e Malit të Zi dhe lider i partisë tjetër shqiptare, asaj UDSH-së.
‘’Hyrja e Forcës në qeveri për momentin nuk është real për shkak të mënyrës se si kjo parti mori qeverisjen lokale në Ulqin’’, tha Dinosha.
Dinosha poashtu ka përmendur se kjo parti ka marrë votat e qytetarëvë duke kritikuar qeverinë.
Situata rreth hyrjes së Forcës në qeveri bëhet edhe më e paqartë pasi edhe vetë deputeti nga radhët e kësaj partie në parlamentin republikan Genci Nimanbegu, pak ditë më parë, kritikoi ashpër qeverinë për mosdialogim për kërkesat politike të shqiptarëve.
‘’Pas heqjes së zonave të veçanta zgjedhore, hedhjes poshtë të amendamenteve me anën e së cilave Malësia do fitonte komunën e plotë, një gjë është e qartë, autoritetet në Mal të Zi nuk ndjejnë nevojën për të zhvilluar një dialog me kërkesat politike të shqiptarëve’’, kishte deklaruar Nimabegu. /Ulqini Online/ /Malesia.Org/
