Kryetari i Komunës urbane të Tuzit Nikollë Gegaj tha se askurrë askush qytetarëve të Malësisë nuk jua mori të drejtën për Komunë të plotë të kësaj trevë, megjithatë do të ishte pa përgjegjshmëri ndaj qytetarëve që referendumi të organizohej para afatit të paraparë.
Për mediet malazeze Gegaj shtoi se, pa plotësimin e parakushteve për një Komunë të qëndrueshme do të hynim në projekte të rrezikshme për vetë qytetarët.
Ai shtoi se “qeveria aktuale përkrahë interesat e qytetarëve, e nëse Komuna e plotë është në interesin e tyre atëherë edhe ne do ta përkrahim, por duhet të jemi të kujdesshëm dhe përgjegjshëm me hyrjen në këtë ndërrim, pasi ajo përgjithmonë do të ndikojë në jetën e qytetarëve”.
“Sot, më shumë se para 10 vitesh Malësia është e gatshme të bëhet Komunë e plotë dhe besoj se për një ose dy vite Komuna do të jetë edhe më e përgatitur për këto ndryshim” thotë Gegaj.
“Referendumin duhet ta kuptojmë, asesi ndryshe por si një fazë të re në të cilën duhet të hyjmë pa ndasi, dhe se këtë periudhë duhet ta shfrytëzojmë për krijimin e kushteve më të mira për të gjithë qytetarët e Malësisë”.
“Malësia ka potenciale të vetëmbahet por në këtë drejtim duhet ende punë. Ndërsa ne dëshirojmë që në një projekt të tillë të hyjmë më sallë të re sportive, infrastrukturë të plotë, rrjetë të ri ujësjellësi, kopsht për fëmijë, qendër tregtare, varrezat dhe projekte tjera të rëndësishme që mundësojnë funksionalizimin normal të Komunës së plotë”.
Kryetari Gegaj tha se pushteti lokal ka marrëdhënie e bashkëpunim të mirë me diasporën, si dhe me disa komuna vendore si Tivarin e Rozhajën. /Malesia.Org/
