Zyrtarë nga Ministria e Forcës së Sigurisë së Kosovës dhe drejtuesit e kësaj force thonë se po punojnë që sa më parë të bëhet funksionalizimi i plotë të FSK-së, duke përfshirë këtu edhe pajisjen me armatim ashtu siç është e paraparë me ligj.
Në kuadër të këtij procesi, zyrtarë nga MFSK deklaruan për Kosovapress se tashmë e kanë bërë pagesën e 375 armëve të gjata dhe bartja e tyre nga vendi i blerjes do të bëhet shumë shpejt për Kosovë.
Zëdhënësi i MFSK-së, Ibrahim Shala, ka thënë për Kosovapress se procedura e armatimit të FSK-së është në përfundim e sipër dhe tani pasi ekspertët e FSK-së kanë përzgjedhur llojin e armëve dhe janë përcaktuar për sasinë, armët pritet së shpejti të vijnë në Kosovë.
Edhe komandanti i FSK-së, gjenerallejtënant Sylejman Selimi, gjatë prezantimit të raportit njëvjeçar mbi zhvillimet në FSK, pohoi për blerjen e 375 armëve të gjata G36 dhe një sasie të municionit.
Forca e Sigurisë së Kosovës parashihet të ketë 2500 pjesëtarë aktivë dhe 800 rezervë. Aktualisht personeli i FSK-së është i përbërë prej 1816 pjesëtarëve. /Koha Ditore/
