Lidhja Demokratike në Mal të Zi reagon ndaj rastit që ndodhi në Ulqin kur një nxënës shqiptar u mori në pyetje nga policia për arsye se kishte kënduar në gjuhën shqipe dhe ishte i veshur me bluzë kuq e zi me stemën e Shqipërisë.
Kjo ndodhi me 28 Nëntor në oborrin e shkollës së mesme në Ulqin, kurse një ditë më vonë, me 29 Nëntor nxënësi u mori nga policia për pyetje.
LD në MZ reagoj duke thënë se festimet e shqiptarëve të 28 Nëntorit i kanë penguar pushtetit apo dikujt nga ai pushtet.
“Shqiptarët edhe me këtë rast po vazhdojnë të ndiejnë presionet e pushtetit malazias, që nga mënyrat më të sofistikuara deri te ato më të vrazhdta. Kjo u tregua edhe në Ulqin, kur Policia, nëpunësi i autorizuar i policisë, më datën 29 nëntor 2012, mori në pyetje – proces nxënësin e klasës IV të Qendrës Shkollore në Ulqin Fatlum Çapriqin, sepse më 28 nëntor 2012, kah ora 19:00, në oborrin e Shkollës, bashkë me shokët e klasës, kishin kënduar këngën Xhamadanin Vija-vija / Është Kosova është Shqipnia… se ka(në) pas flamurin e Shqipnisë… se shokët kanë pasë majicat me stemën e Shqipërisë… dhe, se pas një kohe, me kërkesën e
Ndihmësdrejtoreshës së Shkollës e kanë ndërpre këndimin… (“Procesverbali për mbledhjen e informatave nga qytetarët, pa nr., datë 29. 11. 2012 “).
Lidhja Demokratike e dënon këtë akt presioni ndaj nxënësit e nxënësve. Këtë e konsiderojmë akt presioni ndaj shqiptarëve, kulturës së sonë, ndaj historisë shumëshekullore dhe qenies sonë.
Prandaj i lusim kompetentët në Polici që ta analizojnë këtë rast të papresedan dhe sidomos të shikohet pozita e urdhërdhënësit apo urdhërdhënësve që nëpunësi i autorizuar policor të marrë në pyetje nxënësin(-t) që ka(-në) kënduar këngë për festën dhe në festën më të madhe të kombit shqiptar, 28 Nëntorit – Ditës së Flamurit”, shkruan në reagimin e këtij subjekti politik. /Malesia.Org/
Kopja e procesverbalit të policisë (dërguar nga LDnëMZ)
