Presidenti i Malit të Zi, Filip Vujanovic, nisi sot bisedimet me kryetarët e subjekteve parlamentare në lidhje me propozimet për mandatarin në krijimin e qeverisë së re.
Ai sot pati bisedime me Nazif Cungun – kryetarë i Forcës, Fatmir Gjeka – kryetarë i Partisë Demokratike, Rafet Husovic – Partia Boshnjake, Marija Vucinovic – Iniciativa Qytetare Kroate dhe Darko Pajovic nga partia Mali i Zi Pozitiv. Bisedimet me të gjithë përfaqësuesit e partive tjera do të vazhdoj nesër.
Cungu pas takimit me presidentin e shtetit tha se për pjesëmarrjen e Forcës në pushtetin ekzekutiv do të flasin kur mandatari të jetë i njohur, dhe sqaroi se nuk u takon atyre të propozojnë se kush do të jetë mandatarë.
Gjeka pas takimit me presidentin tha se ka siguruar përkrahjen për formimin e Komunës së Malësisë. Ai sqaroi se presidenti Vujanovic tërësisht e përkrahë formimin e komunës së Malësisë.
Gjeka shpreson që së shpejti do të festojnë formimin e komunës dhe sqaroi se për pjesëmarrjen e koalicionit që përfaqëson në qeverinë e re do të bisedojnë me mandatarin e ri. /Malesia.Org/
