Zona e Zvërnecit, pranë lagunës së Nartës dhe ishullit të Sazanit në Vlorë është kthyer javët e fundit në qendër të debatit publik në Shqipëri, pas nisjes së rrethimit të një pjese të territorit ku planifikohet një investim turistik shumë miliardë dollarësh. Projekti ka nxitur reagime të forta nga ambientalistë dhe banorë lokalë, ndërsa qeveria shqiptare këmbëngul se bëhet fjalë për investim privat në tokë private.
Sipas të dhënave zyrtare të publikuara nga mediat dhe të konfirmuara nga kryeministri i Shqipërisë, Edi Rama, pronare e zonës së rrethuar në Zvërnec rezulton kompania Albania Land Development, e regjistruar në Agjencinë Shtetërore të Kadastrës më 27 maj 2025.
Dokumentet e Regjistrit të Pronarëve Përfitues tregojnë se kompania kontrollohet nga dy biznesmenë nga Katari: Mohamad Moataz Mhd Ruslan Alkhayat dhe Ramez Mhd Ruslan Alkhayyat, të cilët zotërojnë nga 50% të pronësisë indirekte.
Sipas raportimeve, kontrolli mbi projektin realizohet përmes një zinxhiri kompanish të regjistruara në Katar, ku përfshihen Assets International LLC, Assets Real Estate Development WLL, Assets Real Estate Ventures LLC, si dhe grupi i njohur Power International Holding, një nga konglomeratet më të mëdha private në Katar me investime në ndërtim, pasuri të paluajtshme, turizëm dhe energji.
Në projekt përmendet edhe kompania Sazan Real Estate Development LLC, e lidhur me firmën investuese Affinity Partners, e themeluar nga Jared Kushner. Mediat ndërkombëtare raportojnë se projekti parashikon resorte luksoze, marina, vila dhe hotele në zonën e Zvërnecit dhe ishullit të Sazanit, me vlerë të përgjithshme që përllogaritet deri në 4 miliardë dollarë.
Kryeministri Rama deklaroi se SPAK ka kryer verifikime mbi transaksionet dhe origjinën e fondeve, duke shtuar se investitorët e huaj tashmë janë pronarë ligjorë të tokës ku planifikohet investimi. Ai insistoi se toka është blerë nga pronarë privatë dhe jo marrë nga shteti.
Nga ana tjetër, kompania Zvërnec South Adriatic Development deklaroi publikisht se rrethimi i zonës është bërë sipas ligjit dhe se prona është blerë nga pronarë të ligjshëm përmes sistemit bankar.
Megjithatë, projekti ka shkaktuar protesta dhe kundërshtime të shumta për shkak të shqetësimeve mbi ndikimin në mjedis dhe në zonat e mbrojtura të Vjosë-Nartës. Organizatat ambientaliste paralajmërojnë se ndërtimet mund të dëmtojnë habitatet e flamingove, breshkave të detit dhe specieve të tjera të mbrojtura.
Toka në Zvërnec është blerë nga kompani të lidhura me vëllezërit Al-Khayyat nga Katari, ndërsa projekti turistik pritet të zhvillohet në partneritet ose bashkëpunim me rrjetin investues të Jared Kushner, përmes kompanisë së tij Affinity Partners.
Pra, sipas të dhënave publike deri tani, ekzistojnë dy nivele të ndryshme:
Toka rezulton të jetë blerë nga kompania Albania Land Development, e lidhur me vëllezërit Moutaz dhe Ramiz Al-Khayyat nga Katari.
/MALESIA.ORG/
