Ministri i Administratës Publike, Marash Dukaj, ka deklaruar se Forumi Shqiptar është në rrugën drejt bashkimit në një subjekt të vetëm politik, me një platformë të qartë për unifikimin dhe mirëqenien e shqiptarëve në Mal të Zi.
Në një intervistë për Top-Channel, Dukaj theksoi se ky proces pritet të konkretizohet brenda një periudhe të shkurtër kohore, duke shprehur bindjen se unifikimi politik është çelësi për avancimin e interesave të shqiptarëve.
“Unë besoj dhe shpresoj që për një kohë të shkurtër, nuk besoj se do të kaloj më shumë se 1 muaj që Forumi Shqiptar do të bëhet unik, pra të bëhet një subjekt politik dhe me platformë të qartë për unifikimin e shqiptarëve në Mal të Zi sepse unifikimi i shqiptarëve kudo jo vetëm në Mal të Zi është baza, është themeli I arritjeve të sukseseve dhe aspiratave tona që kanë të bëjnë me integrimin e Malit të Zi në BE, me raportet e shkëlqyera me të gjithë fqinjët, në mënyrë të posaçme me Shqipërinë dhe Kosovën, me zhvillimin ekonomik, mirëqenien, zhvillimin kulturor, gjuhësor dhe shumë aspekte të tjera”, shprehet Dukaj.
/MALESIA.ORG/
