Kryetari i Komunës së Tuzit, z. Lindon Gjelaj, njofton opinionin publik se inspektorati komunal ka kryer sot një kontroll në vendin e deponisë së menaxhuar nga SHPK “Deponia”, ku është konstatuar nisja e punimeve ndërtimore pa leje për ndërtimin e kades sanitare nr. 5.
Gjatë inspektimit, u evidentua se në terren ishin duke u zhvilluar gërmime, nivelime dhe heqja e shtresës sipërfaqësore, të shoqëruara me mjete ndërtimi ( dy eskavatorë), ndërkohë që kantieri nuk ishte i shënuar sipas dispozitave ligjore dhe nuk kishte tabelë informuese mbi investitorin, kontraktorin apo lejen ndërtimore.
Përfaqësuesit e SHPK “Deponia” pranuan se nuk posedojnë leje ndërtimi për këto punime. Si rrjedhojë, në bazë të nenit 138 të Ligjit për ndërtimin e objekteve, inspektori komunal lëshoi vendim për ndalimin e menjëhershëm të punimeve.
“Kjo është një dëshmi e qartë e vendosmërisë sonë për të zbatuar ligjin dhe për të parandaluar çdo ndërtim ilegal në territorin e Komunës së Tuzit. Jemi veçanërisht të kujdesshëm ndaj projekteve që mund të kenë ndikim të madh në mjedis dhe në shëndetin e qytetarëve tanë”, deklaroi Gjelaj.
Komuna e Tuzit do të vazhdojë të zbatojë me vendosmëri ligjin dhe të parandalojë çdo ndërtim ilegal në territorin e saj, veçanërisht kur bëhet fjalë për projekte që mund të kenë ndikim të rëndësishëm në mjedis dhe shëndetin e qytetarëve, theksoi Gjelaj.
Malesia.org
