Maturantët e parë të shkollës së mesme “25 Maji” në Tuz, kanë nisur një nismë për ndryshimin e emrit të shkollës. Ata propozojnë që institucioni të quhet Shkolla e Mesme e Përzier “Besa Malësia”.
Propozimi është mbështetur nga bordi i shkollës. Drejtori i shkollës, Sehad Lulanaj, tha për gazetën “Dan” se iniciativën e kanë sjellë ish-maturantët e brezit të parë, të cilët së fundmi festuan 50-vjetorin e diplomimit.
“Bordi i shkollës e mbështeti unanimisht këtë nismë, por nuk kemi ngutje. Do të presim për të parë nëse do të vijnë edhe propozime të tjera, qoftë nga qytetarët apo nga këshilli i mësuesve. Duam që emri i ri të jetë universal, që të mos krijojë ndasi”, u shpreh Lulanaj.
Ai theksoi se administrata e shkollës ende nuk e ka zyrtarizuar iniciativën, por është e hapur ndaj saj.
“Të gjithë duhet të biem dakord përpara se t’i drejtohemi Komunës së Tuzit dhe Ministrisë së Arsimit, Shkencës dhe Inovacionit me një propozim. Për momentin, sugjerimi i vetëm është “Besa Malësia”, shtoi Lulanaj.
Synimi i ish-maturantëve është që emri i shkollës të mos lidhet me ndonjë datë apo ngjarje të caktuar.
/MALESIA.ORG/
