Tuz – Qendra e Kulturës dhe Informimit “Malësia” në Tuz ka shprehur mirënjohje dhe respekt të veçantë për kontributin e çmuar të drejtorit të saj, z. Vasel Berishaj, i cili sot, më 29 korrik 2025, del në pension.
Në një njoftim zyrtar të institucionit theksohet se Berishaj ka lënë gjurmë të pashlyeshme gjatë viteve të drejtimit, duke dhënë një kontribut të madh në zhvillimin kulturor dhe organizimin e aktiviteteve të shumta që kanë pasuruar jetën kulturore të Malësisë.
“Shprehim falënderimin tonë të thellë për bashkëpunimin e sinqertë dhe profesional gjatë gjithë këtyre viteve. Në emër të të gjithë të punësuarve në QKI ‘Malësia’ – ju faleminderit për çdo këshillë, vendim dhe përpjekje që keni dhënë me zemër për këtë institucion”, thuhet në reagimin e QKI “Malësia”.
Berishaj për vite me radhë ka qenë një figurë kyçe në organizimin e aktiviteteve kulturore dhe ruajtjen e trashëgimisë shqiptare në Malësi.
Gjatë mandatit të tij, në QKI “Malësia” u arrit një ngritje e dukshme e nivelit të këtij institucioni kulturor duke filluar nga organizimi i brendshëm dhe infrastruktura, deri te pasurimi i kalendarit kulturor. U rrit numri i aktiviteteve dhe bashkëpunimeve me artistë, studiues e institucione brenda dhe jashtë vendit, ndërsa qendra u bë një pikë referimi për promovimin e kulturës, historisë dhe traditës së Malësisë.
/MALESIA.ORG/
