Sot në Qendren Klinike të Malit të Zi, ka humbur jetën sekretari gjeneral i UDSH-së, njëheri edhe këshilltar në Kuvendin e komunës së Ulqinit, Dritan Alaj, në moshën 38 vjeçare.
“Të dielën në Qendrën Klinike të Malit të Zi ndërroi jetë sekretari gjeneral i partisë tonë dhe këshilltari në Kuvendin e Komunës së Ulqinit Dritan Alaj (38).
Kjo është humbje e pazëvendësueshme para së gjithash për familjen e tij, por edhe për partinë tonë, sepse Dritani ishte vigan në kuptimin e plotë të kësaj fjale.
Po ashtu, kjo është humbje e madhe edhe për shumë qytetarë të Ulqinit dhe Tivarit, sepse Dritani me punën e tij të përkushtuar në Njësinë Zonale të Fondit Pensior – Invalidor ishte përherë në shërbimin e të gjithëve.
Neve, si miq dhe shokë të tij partiak, na mbetet obligimi që të ndihmojmë familjen e tij tani dhe përherë dhe ta kujtojmë në mënyrën më të bukur, ashtu siç e meritoi ai me jetën, punën dhe veprimtarinë e tij në këtë botë”, thuhet në kumtesë të UDSH-së.
