Ish ministri dhe ish kryetari i UDSH-së Ferhat Dinosha, në një intervistë dhënë portalit Analitika shprehet rreth situatës aktuale politike të shqiptareve në Mal të Zi por jo vetem, duke mos harruar të përmend edhe hapat e rëndësishëm politik të ndërrmarrë nga partia e tij gjatë kohës që kemi lënë pas.
“Jemi partia e parë e pakicave që ka hyrë në qeverinë e parë demokratike të Malit të Zi. Më vonë na u bashkuan edhe boshnjakët dhe kroatët kurse sot do të dëshironin edhe disa parti shqiptare“, shprehet Dinosha duke aluduar në mënyrë indirekte në Forcën e Re Demokratike.
“Iniciativat tona gjithmonë kanë marrë parasysh interesin e përgjithshëm të Malit të Zi, jo vetem interesin e shqiptareve. Thënë më mire, ne interesin tone nuk e kemi vendosur jashtë interesit të përgjithshëm të Malit të Zi“, vazhdon Dinosha duke shprehur kënaqësinë me aktivitetin e UDSH-së me atë çka kanë bërë për shqiptaret në Mal të Zi por edhe për shtetin e Malit të Zi.
Duke folur për ndarjen e fundit brenda UDSH-së, Dinosha thekson se nuk bëhet fjalë për ndarje por për largim të një grupi njerëzish që mendojnë se Ulqini do ta ketë më mire nëse largohet nga Podgorica.
“Ajo nuk ishte ndarje, ajo ishte largim i një grup njerëzish të cilët askund nuk do ta kenë më mirë se në UDSH. Koha do ta tregojë se pse ata vepruan kështu dhe pse ishin të gatshëm për të luajtur me vullnetin e votuesve për të krijuar një shumicë të re në qeverisjen lokale. Por, mënjeherë është e qartë se për Ulqinin nuk është mirë që të largohet nga Podgorica. Këtë është duke e bërë shumica e re“, shprehet Dinosha. /Ulqini Online/
