Me një votim rrufè, të bërë të mundur vetëm pas përjashtimit nga salla të shumicës së deputetëve të Vetëvendosjes, Kuvendi i Kosovës miratoi demarkacionin e kufirit me Malin e Zi.
Me 80 vota pro, saktësisht sa duheshin, dhe 11 kundër, koalicioni qeveritar bashkë me LDK-në miratuan përcaktimin e vijës kufitare me Malin e Zi. Hera e pestë e mbledhjes së Kuvendit ishte vendimtarja, pasi 4 herë seanca u ndërpre nga gazi lotsjellës i hedhur nga deputetët e Vetëvendosjes.
Pas përsëritjes së episodeve me gazin lotsjellës, Kryesia e Kuvendit përjashtoi shumë deputëtë të Vetëvendosjes nga salla, ndërsa 7 prej tyre përfunduan në pranga, pasi dyshohet se janë përfshirë drejtpërdrejt në hedhjen e gazit. Në momentin kur është votuar Demarkacioni, i pranishëm në seancë ka qenë vetëm deputeti i VV-së, Glauk Konjufca.
Vetëvendosje denoncoi praktikat, sipas saj antidemokratike të Kuvendit, e tha se miratimi i ligjit ishte tradhti ndaj vendit.
Por sipas koalicionit qeverisës, miratimi i ligjit është plotësimi i një kushti të rëndësishëm për liberalizmin e vizave.
