Shtëpia botuese “Koliqi” (Prishtinë) ka njoftuar botimin e librit të ri të studiuesit nga Malësia, Albert Bikaj, “Zanafilla e mendimit kombëtar: diskursi i humanistëve arbënorë gjatë Renesancës”.
Libri trajton formësimin e mendimit kombëtar në Europën mesjetare, paralelisht me veprat e humanistëve arbërorë të shekujve XV–XVI, me fokus te Marin Barleti, Marin Beçikemi dhe Dimitër Frangu. Përmes kësaj analize, autori shqyrton zhvillimin e konceptit të kombit dhe më pas mënyrën se si humanistët arbërorë, në mërgatë dhe në kontakt me botën latine, ndërtuan identitetin kombëtar.
Medievisti i shquar nga Kosova, prof. dr. Jahja Drançolli, thekson se libri përfaqëson “një kontribut origjinal dhe të rëndësishëm për historinë dhe historiografinë shqiptare”, duke hapur rrugë për kërkime të reja mbi fillesat e mendimit kombëtar shqiptar.
Sipas njoftimit të botuesit, libri pritet të dalë në treg gjatë muajit të ardhshëm.
/ MALESIA.ORG/
