Kryetari i Lëvizjes Qytetare për Reformën e Bashkuar (URA), njëheri edhe zëvëndeskryeminister i Malit të Zi, Dritan Abazoviq, pritet që sot ta propozojë formimin e një qeverie të pakicës, si zgjidhje për krizën politike në Mal të Zi.Oferta e kësaj partie për subjektet e tjera parlamentare pritet të prezantohet sot përmes një konference për medie, ndërsa palët që pritet të përfshihen në këtë model janë mbledhur mbrëmë për ta dhënë konceptin final.
Siç mësohet jozyrtarisht nga Portali i Radiotelevizonit Publik të Malit të Zi nga disa burime, qeveria e re do të përbëhet nga URA, SNP dhe partitë e pakicës. Kjo është diskutuar me përfaqësues të partive shqiptare dhe boshnjake. Sipas këtij propozimi, në Qeveri nuk do të kishte përfaqësues të DPS dhe DF, transmeton Klankosova.tv.
Qeveria aktuale duhet të shkarkohet në mënyrë që të zgjidhet një e re. Që të bëhet kjo duhet një interpelancë, e cila duhet të nënshkruhet nga 27 deputetë. Grupi politik që mbron këtë model nuk ka aq shumë firma deri më tani.
Nëse Abazoviq arrin që të bëhet kryeministër i Malit të Zi, ai do të bëhej i pari shqiptar që mban një post të tillë atje krahas Edi Ramës në Shqipëri e Albin Kurtit në Kosovë.
Malesia.Org
