Në mbledhjen e djeshme të Parlamentit Mali të Zi, gjatë diskutimit mbi ekspozenë e mandatarit, deputeti shqiptar nga partia Mali Zi Pozitiv, Dritan Abazoviq fajësoi Kryeministrin e ri Milo Djukanoviq për gjendje të pa kënaqshme të pakicave, duke thënë:
“Ju keni bërë që zonat dhe vendet ku jetojnë pakicat të jenë më të pazhvilluarat në këtë shtet, keni bërë që nga popujt pakicë kemi më së shumti emigrues, dhe në fund, për fat të keq të bashkatdhetarëve të mi, ju fituat përkrahjen e tyre pa rezervë për të formuar qeverinë e re edhe pse ndoshta as nuk e kërkuat. Shpërblimi juaj ndaj tyre ishte që ju nuk e keni parë të udhës që asnjë shqiptarë ta kandidoni për ministër”, tha Abazoviq.
Ai ka lëshuar një ndër kritikat më të rënda në drejtim të kryeministrit të Mali të Zi Milo Djukanovic duke e quajtur atë si kryeminister antishqiptar.
Duke u drejtuar qytetarëve në shqip ai tha që Kryeministri i ri ka tregu politikë antishqiptare dhe mbas 15 viteve nuk i dha mandat asnjë ministri shqiptar.
“Qytetarë të nderuar, pse ndodhi kjo Ju duhet të pyesni partitë shqiptare të cilët e përkrahën këtë Qeveri, por të jeni të bindur që ky person nuk mund ti plotësoj premtimet që ka dhënë”, vlerësoi Abazoviq.
Ai e cilësoi Kryeministrin e ri si personin më përgjegjës për ngecje ekonomike dhe morale të shtetit, duke shtuar:
“Të gjitha privatizimet e juaja ishin të gabuara dhe ju i shitët resurset shtetërore. Ju shkatërruat turizmin duke ja filluar nga Ulqini, qyteti nga i cili vi une, si dhe të gjithë qytetet përreth. Ju keni vendosur pranga në formë të kufijve të Mirave Detare dhe ju nuk i ktheni qytetarëve pronën. Ju nuk i jepni komunat që i premtuat edhe pse qytetarët kanë të drejtë ti kenë”, përfundoi Abazoviq.
Nuk ka vonuar as përgjigja nga ana e kryeministrit të ri Milo Djukanovic duke thënë se nuk është antishqiptar.
‘’Sa jam unë kryeministri antishqiptar, le ta lëmë që të vlerësojnë shqiptarët. Unë nuk jam as antishqiptar, as antiserb, as antiboshnjk apo as antimalazez, por përpiqem që të jem kryeministër në Mal të Zi të të gjithë qytetareve. Më mirë numëroni ministrat nga populli shqiptar prej vitit 1997 ‘’ – tha Djukanovic. /Malesia.Org/
