TIRANË- Deputeti i Partisë Socialiste Erion Brace ka akuzuar sërish sot ministrin e Mbrojtjes, Arben Imami për shitjen e armatimeve. Duke iu referuar dokumenteve zyrtare, Brace tha se aty figuron që tregtia është bërë me një kompani malazeze, por në këtë rast shkelet siguria kombëtare, siç sqaroi ai.
“Sot po paraqes para jush një dokument monopolistik, në tregtinë e armëve, municioneve e pajisjeve ushtarake. Në të gjithë dokumentin rezulton se vetëm një ngarkesë ka shkuar në Kongo dhe pjesa tjetër në Mal të Zi. I ka dhënë Malit të Zi aq shumë predha, sa çdo familje malazeze do kishte secila nga dy predha. Duke qenë se jemi shtete fqinje, kjo përbën një shkelje të sigurisë kombëtare”, tha Brace.
Brace hodhi akuza më tej se këto armë nuk kanë qëndruar në Mal të Zi, pasi sic tha ai, “të tilla letra përpilohen sa herë ka trafik armësh, ku kanë shkuar 200 mijë predha?”, shtoi më tej deputeti.
Deputeti i majtë tha se asnjë nga dokumentet e publikuara prej tij nuk ka siglën që i klasifikon si sekrete shtetërore.
“Ky dokument i lëshohet çdo kompanie që shkon për të blerë. “Rrëzoj me neveri shprehjen e ministrit, se unë shpif, të flasësh me dokumenta do të thotë të thuash të vërtetën. Korrupsioni nuk është sekret shtetëror, është sekret qeveritar, privat por kurrë sekret shtetëror. Mos e lejoni më të tallet me ju dhe nëpërmjet jush me opinionin publik”, nënvizoi ai.
Brace tha më tej, se ka marrë kërcënime nga ministri Imami. “Kërcënimet e tij ndaj nënpunësve i marr si aktrimin e tij të radhës dhe e siguroj që do kthehen në padi, ndërsa kërcënimet personale ndaj meje, i them Imamit se ai nuk vlen më shumë se unë”, përfundoi ai.
