Kryetari i DPS Milo Djukanovic deklaroi dje në Tuz se javën e ardhshme do të shpallet referendumi konsultativ për statusin e KU të Tuzit dhe se pushteti për ketë çështje do ta respektojë vendimin e banoreve të Malësisë. Ai në tubimin promovues të koalicionit “Mali i Zi evropian”, i cili u mbajt dje në Tuz , paralajmëroi se vendimi për shpalljen e referendumit do të shpallet në mbledhjen e kuvendit të KU të Tuzit me 4 tetor.
“Nëse kemi kërkuar që për të gjithë ne të vendosim në çfarë shteti do të jetojmë kemi obligim që të respektojmë edhe të drejtën dhe vullnetin tuaj se në çfarë komune dëshironi të jetoni duke pasur parasysh interesat tuaj dhe si to të krijoni kushtet që mënyra e organizimit të jetë ekonomikisht e qëndrueshme, deklaroi Djukanovic në tubimin e djeshëm të koalicionit Mali i Zi evropian që u mbajt QIK Malësia në Tuz. Ai gjithashtu banorët e Malësisë i porositi se nuk kanë nevojë të shqetësohen se DPS do të jetë garantë se vullneti i tyre do të respektohet, njofton Radio Televizioni i Malit të Zi. /Malesia.Org/
