Na mësuan mësuesit tonë dikur e ne vazhduam t’i mësojmë nxënësit tonë për historinë e lavdishme të kombit . Kush nuk ndihej krenar me gjithë këtë histori ? Kush nuk merrte pjesë në korin milionësh të këngëve atdhetare kushtuar datave e personazheve të historisë sonë? Këngët për trimat e atdheut u kënduan edhe në vitet më të vrara të Kosovës . U kënduan për të mbajtur gjallë kujtimin për trimat dhe betejat e mëdha dhe e kishin arritur qëllimin sepse me dekada e dekada e madje edhe me shekuj identiteti shqiptar po ruhej dhe po mbrohej. Edhe në betejat më të lavdishme të luftës për lirinë e Kosovës djelmosha e vajza shqiptare me këngën për trimat e për Shqipërinë kanë rrugëtuar drejt qëllimit sublim. Shekujt krijuan me ngjarjet e ndodhura historinë dhe shqiptarët as edhe një herë nuk ishin fajtor pse po ngjanin katrahura e tmerre. Pse po ngjanin luftëra , djegie , masakra e vrasje masive. Shqiptarët as edhe një herë nuk kanë vrarë e djegur civilë të pambrojtur e fqinjët e tyre këtë e kanë bërë me qindra e mijëra herë qe besa. Por, në kohë e hapësirë me fajin e inatin mes nesh shqiptarët u barazuan me vrasësit e hijet e zeza sepse vetë kontribuuan për këtë.
Shqiptarët në Kosovë, një pjesë e tyre, kanë bërë tani e sa vite lojë me historinë tonë dhe për të marrë nga ca para në emër të projekteve për pajtim krijuan atmosferë se duhet harruar e kaluara dhe se duhet krijuar filma e projekte të rrejshme të pajtimit. Pa u kthyer ende eshtrat e njerëzve të vrarë e të tretur nga bandat vrastare serbe dolën e po dalin individë, shoqata bastarde e kolumnistë që duan të na shpallin kosovar dhe që kërkojnë të harrojmë historinë thua se ne jemi fajtor për gjithë tmerret në Ballkan me vite e dekada.
Duke parë këtë pozicionim tonin fqinjët vazhduan me talljet dhe lojën ndaj historisë sonë. Maqedonia e bëri Shkupin fragment të mesjetës dhe e krijoi ambientin më të tmerrshëm antishqiptar. Nuk u mjaftua me kaq po edhe botoi tekste shkollore për nxënësit shqiptarë me fyerjet nga më të rëndat për kombin e tyre dhe asgjë nuk ngjau. Individë e njerëz me emra shqiptarë në qeverinë e Maqedonisë shprehen indinjatë dhe u mjaftuan me kaq. Nxënësi shqiptar atje do të mësojë ne ato libra dhe sa më shumë që e fyen e shanë kombin e tij aq më të mirë do ta marr notën në ditar. Loja dhe tallja me historinë shqiptare po vazhdon në Ballkan e për këtë gjendje , më shumë se armiqtë, fajin e kanë shqiptarët sepse nuk janë të bashkuar dhe punojnë që ta zhdukin një pjesë të historisë. Punojnë e japin para që ta shkruajnë pjesën tjetër të historisë duke vënë si kryepersonazh vetën e tyre e duke mohuar gjithë të tjetët. T’i shikojmë bashkë tekstet shkollore të letërsisë, historisë e muzikës dhe do të shohim se jemi bërë komb me histori të harruar e të ndarë në fragmente.
Rrahman Jasharaj
